Manuel Fontán gaña a praza mundialista no C-1 1.000 Xuvenil

O padexeiro do Muíño impúxose con autoridade na final da Copa de España, como a catoirense Carla Frieiro no K-1 500 Xuvenil

.

Misión cumprida. E con creces. O dobre campión na última edición dos Xogos Olímpicos da Xuventude, Manuel Fontán Señoráns, accedeu onte con facilidade á final da primeira Copa de España de Esprint Olímpico da tempada, impoñéndose cunha brutal autoridade na loita polo título do C-1 1.000 Xuvenil e facéndose con el coa praza española no vindeiro Campionato do Mundo da categoría. Cun crono de 4 minutos, 14 segundos e 627 milésimas e unha cadencia no seu ataque á lámina do encoro asturiano de Trasona imposible de seguir para os seus rivais. Yaque García de la Borbolla (Náutico Sevilla) e Joan Toni Moreno (Port de Pollença) tiveron que conformarse con pelexar entre si polo segundo posto, que o andaluz se levou a 4,117 segundos de Fontán, e por tan só 2 décimas respecto ao terceiro clasificado.

Sen mái praza ca do C-1 1.000 Xuvenil para as seleccións españolas de augas tranquilas en xogo, a catoirense das Torres-Romaría Vikinga Carla Frieiro Carril deulle onte a outra gran alegría da mañá ao piragüismo arousán. Como Manuel Fontán, sumando ao seu título de 5.000 no Campionato de España de Inverno o de gañadora da primeira Copa de España da tempada, no caso de Frieiro, no K-1 500 Xuvenil Feminino. Tamén como o padexeiro do Náutico O Muíño, cunha insultante claridade, en 2.02,066, con 2,230 segundos de vantaxe sobre a segunda, Lara Feijoo (Kayak Tudense) e 2,673 respecto a Raquel Torres (Piragüismo Verducido-Pontillón).

A 220 milésimas de segundo quedou o vilagarcián do Breogán do Grove, Diego Romero, de reunir o trío de ases. Pero o canoísta do Poio-Conservas Pescamar Adrián Sieiro lle gañou a partida nos derradeiros dez metros da final do C-1 1.000 Sénior, logo de que Romero dominase a práctica totalidade dos 990 anteriores. Sergio Vallejo (Poio) foi terceiro a 2,687 do seu compañeiro de club.

María Pérez Aragunde, do Náutico O Muíño, foi tamén segunda, no C-1 500 Xuvenil, a 1,350 segundos da campioa María de la Peña (E.P. Ciudad de Pontevedra).

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Manuel Fontán gaña a praza mundialista no C-1 1.000 Xuvenil