A Liga Galega atopa unha ACT disposta a asinar un convenio que protexa os dereitos dos club galaicos
AROUSA
As directivas das dúas entidades mantiveron a súa primeira xuntanza cara a cara
25 ene 2018 . Actualizado a las 13:13 h.Do 2003 data a primeira edición da Liga da Asociación de Clubes de Traineras (ACT). No ano 2006 botaba a andar a Liga Galega de Traíñas (LGT) impulsada pola Asociación Liga Noroeste. As directivas dunha e doutra mantiveron onte en Castro Urdiales a primeira xuntanza de traballo conxunta de ambas as dúas entidades, segundo apuntaban ao termo da mesma os seus protagonistas. Un fito histórico cuberto en menos dunha hora da mellor das maneiras. Co aparente consenso respecto aos tres puntos en cuestión, todos eles expostos desde o lado galego da mesa de reunión: formalización dos ascensos e dos descensos, bases para a realización de fichaxes de remeiros, e establecemento de dereitos de formación de remeiros entre as dúas ligas.
O desde o pasado mes de decembro presidente da ALN, o vilaxoanés Melchor Gago, adiantara na toma de posesión do cargo entre as súas prioridades a sinatura dun convenio que regulase as relacións entre as dúas ligas, a fin de proporcionarlles aos clubs galegos unha cobertura legal que protexera os seus dereitos deportivos e económicos, desvalidos hoxe ante o interese de calquera club da ACT por nutrirse dos planteis da LGT.
«Sorprendentemente, unha cousa que parecía que tiña tanta dificultade, resolveuse en menos dunha hora. Eles entendían que a ARC -a Liga vasco-cántabra- xa tiña ese marco que pedimos, e que o ilóxico era que a Liga Galega non o tivera», declarou Gago tras unha xuntanza con Borja Rodrigo, presidente da ACT, encabezando a outra delegación. «Quedamos que eles redactarán un documento sobre as nosas ideas». ¿E cales son esas ideas? Pois ademais de formalizar en papel o dereito a participar nos play-offs á ACT de dúas traíñas galegas, fixar unhas salvagardas económicas na liña das da ARC, e das que rexen entre os clubs da LGT, que cobran unha cantidade estipulada polos dous primeiros remeiros propios que lles poida levar un terceiro da ACT, debéndose negociar a saída do terceiro e sucesivos. Neste último punto, igualmente se se trata de non propios. «As cousas están encamiñadas, foi un encontro moi cordial e produtivo», salienta Gago, como proba a comida posterior de ambas delegacións. O probable acordo carecerá de efectos retroactivos.