O Museo acollerá a exposición «Os mundos de Carlos Casares»

A mostra, na que colabora a Deputación, poderá visitarse no Edificio Sarmiento entre o 8 e o 26 de novembro


Pontevedra

Os mundos de Carlos Casares é un percorrido pola obra, a vida e o tempo do autor homenaxeado este ano coas Letras Galegas, a través de paneis explicativos, materiais audiovisuais, obxectos persoais, imaxes inéditas e documentos históricos.

A mostra, foi presentada onte en Vigo, onde comezará o seu percorrido pola provincia. Mañá será inaugurada na Casa das Artes da cidade olívica e posteriormente chegará ao Museo de Pontevedra, para a súa exhibición no Edificio Sarmiento do 8 ao 26 de novembro.

A Deputación Provincial é unha das entidades que colabora coa Fundación Carlos Casares para facer posible esta exposición, comisariada por Chus Martínez Domínguez. Segundo expuxeron onte os organizadores a mostra propón un achegamento ao universo vital e literario de Carlos Casares nunha sucesión de cinco territorios simbólicos: Paisaxes, Luzadas, A Viaxe, Conviña... e O Redondel, que van explicando as cuestións fundamentais da súa vida, da súa produción literaria e do seu compromiso co país e coas súas xentes.

Diferentes etapas

«O que fixemos foi un traballo de interpretación da vida, da forma de ser, e da visión da literatura, moi transparente, que tiña», sinalou Gustavo Adolfo Garrido, comisario e secretario da Fundación Carlos Casares. Explicou, ademais, que «utilizamos as maletas que compoñen a montaxe como un símbolo de tránsito entre as diferentes etapas». Unha idea na que tamén incidiu Hakan Casares, fillo do escritor, ao asegurar que a mostra «non só ilustra a traxectoria de meu pai, senón que dá conta do tempo no que lle tocou vivir e dun lugar, que é Galicia». Ademais, manifestou o desexo de que «a exposición esperte algo de interese pola literatura sobre todo entre a xente nova, que lean algo, e que lean en galego, porque eu creo que iso sería o que a meu pai lle gustaría, e se aínda por riba acabaran escribindo e en galego, seguro que lle gustaría aínda máis».

Pola súa banda, o secretario xeral de Política Lingüística, Valentín García, que tamén asistiu a presentación, puxo en valor o legado do autor, ao que cualificou como «un gran novelista», e sinalou que «a súa riqueza ía máis aló da literatura; tamén estaba noutros xéneros como o xornalístico ou na curiosidade que sentía polas novas tecnoloxías do momento».

O deputado de Cultura, Xosé Leal, pola súa banda, coincidiu en que nesta mostra «poderemos coñecer mundos que van moito máis aló da literatura en si».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

O Museo acollerá a exposición «Os mundos de Carlos Casares»