«Sempre escribo as novelas guiado por un impulso vital»

O autor presentará a súa novela máis recente, «Terra Quiemada», no lugar no que creceu


Non sabe de onde lle ven a afición pola lectura e a escritura, aínda que o seu pai tiña moitos libros na casa, pese a non ser un afeccionado á mesma. Ramón Caride lembra rapidamente a súa primeira mestra como impulsora desa soltura coas palabras que xa o levou a publicar algo máis de medio cento de libros -entre poesía, ensaio e novela-. Góstanlle as historias con pulso, como as novelas policiacas ou de terror, as de aventuras ou todas aquelas que lle proporcionen un enganche ó lector. Quizais por iso Edgar Allan Poe, Charles Dickens ou Stevenson son os primeiros nomes que saen dos seus beizos cando se lle pregunta polos seus autores predilectos.

-Que vai atopar o lector en «Terra queimada»?

-É unha novela que conta varias historias separadas por un lapso temporal. Hai unha historia que transcorre no século XIX, hai outra ambientada polo 2006 e moitas outras que se entrecruzan. É unha novela coral, co punto de partida unha taberna dunha aldea de montaña.

-De onde saíu a idea?

-Unha parte saíu do que leo e outra que xa tiña esbozada dun relato breve que escribín hai anos, sobre catro homes que se dedican a comprar e cortar madeira. Son distintas cousas que nun momento dado vin que se podían entrecruzar, a medida que escribía atopei conexións ocultas

-Buscaba facer crítica ou é que o relato fluíu así, sen máis?

-A morte da cultura rural é unha das cousas que me obsesionan desde neno. Crieime nunha aldea pequena e o tema demográfico, en Ourense e todo o interior de Galicia, é moi grave. Non só porque non haxa xente nova, senón porque desaparece toda unha cultura milenaria, con saberes e oficios, con toponimia e maneiras de ser. Unha visión do universo desaparece completamente cando o campo queda abandonado. E os incendios funcionan como metáfora da destrución.

-Ten unha rutina de escritura ou método de traballo?

-Non. Eu sempre escribo as novelas guiado por un impulso vital. Unha vez rematada esta, a seguinte pode tardar en chegar tres meses como pode tardar tres anos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«Sempre escribo as novelas guiado por un impulso vital»