O estremo dereito cambadés asina no seu novo equipo ata xuño do 2017, co primeiro reto de axudar ao seu ascenso á Segunda B
07 ene 2016 . Actualizado a las 05:00 h.O estremo dereito cambadés Agustín Enmanuel Pastoriza, Pibe (Buenos Aires, 31 de xaneiro de 1996), participaba na tarde de onte no seu primeiro adestramento co filial do Real Oviedo. Un Vetusta que avanza sexto no Grupo 2 da Terceira División, e ao que chega traspasado desde o filial do Betis, este en Segunda División B.
Cun novo contrato polo que resta de campaña e a totalidade da seguinte Pibe, que foi presentado na tarde do martes coa camisola do seu novo equipo, explicaba onte horas antes do seu primeiro adestramento co Oviedo B como se xestou o inicio da súa nova etapa deportiva. «Yo me quería ir del Betis», declara, un club ao que chegara da man do ex técnico do Vilalonga Guillermo Fernández Romo no verán do 2013 no seu segundo ano de xuvenil, procedente do Pontevedra.
Tras despuntar na canteira bética, ata o punto de chegar a disfrutar do seu debú na Primeira o 18 de maio do 2014, no encontro que o equipo de Sevilla disputou no campo do Osasuna, o pasado verán Pibe iniciaba o seu derradeiro ano de contrato co Betis no filial. Un equipo no que só xogou 30 minutos, fronte ao Jumilla, dando a asistencia do 2-3 final co que que o Betis B remontou o partido.
Pibe explica que tivo outras ofertas de 2.ªB, pero que «quería ir a otro filial». E o Vetusta aspira a entrar na vindeira promoción.