Este ano reparte 125.950 euros para este fin, 7.000 máis que o ano anterior
24 oct 2014 . Actualizado a las 16:48 h.As entidades benéficas, formativas, culturais e deportivas cambadesas percibirán este ano un montante global de 125.950 euros en subvencións de fondos municipais, o que supón un incremento de 7.250 euros con respecto ó curso anterior. As asociacións benéfico-asistenciais sen ánimo de lucro percibirán un total de 36.000 euros en axudas económicas. Trátase de Esperanza Salnés con 7.500 euros; BATA, 6.000 euros; Hermanitas de los Ancianos Desamparados, 5.000 euros; Fundación Amigos de Galicia 5.000; Asociación Diminuídos Psíquicos Con Eles, 2.000; Cáritas Parroquial de Cambados, 1.900 ; Asociación contra o Cancro, 1.900; AFASAL, 1.900; Comité antiVIHArousa, 2.000; B.A. Rías Baixas, 1.800; e Down Pontevedra Xuntos, 1.000 euros.
Respecto ás axudas do Concello a entidades socioculturais, a contía total ascende a 19.950 euros. A meirande parte desta partida corresponde ás doce entidades de ocio e tempo libre que suman 7.100 euros; as culturais e musicais acadan 4.800 euros; as comisións de festas populares percibirán 3.000 euros (600 euros cada unha); mentres que as AMPA dos colexios e institutos perciben un total de 5.100 euros.
No apartado de entidades deportivas, dezaseis clubs cambadeses repártense este ano un total de 70.000 euros —5.000 máis que o exercicio anterior—. Coma sempre, o Xuventude de baloncesto, con 18.000 euros, e o Juventud Cambados de fútbol, con 14.000, son os máis beneficiados «conforme á baremación oficial que lles outorga a máis alta puntuación», segundo explica o Concello.
Por detrás quedan o Cambados Tenis de Mesa, 10.000 euros; Piragüismo Cambados, 8.500 euros; o XAV de voleibol con 6.500; Natación Salnés, 2.500 euros, e o club Tenis Cambados, 2.000 euros. O Beiramar de fútbol recibe 2.000 euros; o club Atletismo Cambados, 1.000; o Club Motos Vellas Salnés, 1.000; o Deportivo San Tomé, 1.000 euros; o club Pesca As Joritas, 700 euros; o club Albariño de Xadrez, 700 euros, o club Mariño Salnés, 300 euros e a Asociación Deportiva da Policía Local, 300 euros.