Un curso aborda na Illa o patrimonio lúdico galego

maría santalla VILAGARCÍA / LA VOZ

AROUSA

MONICA FERREIROS

Conferencias, obradoiros didácticos, presentación de libros e prácticas de navegación son algunhas das propostas

13 sep 2012 . Actualizado a las 06:35 h.

O xogo é unha das primeiras ferramentas no proceso formativo dos cativos, daí que sexa un recurso educativo de primeira orde. Se a esta circunstancia lle engadimos que o galego é un espazo enormemente rico en xogos tradicionais teremos a explicación de por que unhas xornadas sobre patrimonio lúdico e educación. Se ademais pensamos na tradición mariñeira da Illa, que mellor escenario que o municipio enclavado no medio da ría para achegarse ao patrimonio lúdico costeiro. Así que os días 21 e 22 deste mes, venres e sábado, a localidade será sé da cuarta edición dos cursos que, sobre xogos tradicionais, organizan a Asociación galega do xogo popular e tradicional e Nova Escola Galega.

O curso está dirixido a profesionais da educación e do tempo libre, aínda que a asistencia ás conferencias será libre. Entre outros relatores estarán presentes os investigadores galegos Apolinar Graña Varela e Uxío Rodríguez Fernández. Pero vaiamos por partes.

As xornadas abriranse no instituto da Illa o día 21 pola tarde, e como a práctica adoita ser a mellor conselleira á hora de adquirir coñecementos, inauguraranse coa aprendizaxe de xogos tradicionais. Seguidamente desenvolveranse unha serie de obradoiros didácticos nos que se abordará a relación dos xogos tradicionais con outras disciplinas coma a música, as artes e as tecnoloxías e a natureza.