«Hoxe o BNG xa non representa a todo o espectro nacionalista»

Para Trigo, a fronte ignora o acordo entre ideoloxías que era a súa esencia


vilagarcía / la voz

O xoves, a media tarde, Francisco Trigo poñía fin a 30 anos de militancia no BNG.

-¿Como se chega a tomar unha decisión coma esta?

-O convencemento de que o proxecto, dende o meu punto de vista, deixou de ser unha fronte. É público e notorio que eu fun unha das persoas que máis apostou polo modelo frontista. Pero este modelo está esgotado dentro do Bloque e cómpre construír unha nova forma organizativa. Nunca vou falar mal nin teño nada contra do BNG, iso sería unha terrible contradición, pero xa non é o meu modelo.

-Ás veces non é doado entender o que sucede nese nivel interno. ¿Por que rompe o modelo?

-O BNG non era cousa dun home un voto, porque ademais de militantes individuais está conformado por forzas políticas. É dicir, por ideoloxías diferentes. Temos un nexo de unión, o progresismo, o antiimperialismo e o sentimento do país, o nacionalismo, que non é unha ideoloxía, senón un sentimento. E logo, eu teño a miña propia ideoloxía, e ese nexo que me levaba a estar en comuñón con outros que tiñan o mesmo sentimento, uníanos o pais e a defensa das maiorías sociais. Ese modelo está finiquitado. Iso era o BNG, e se na asemblea constituínte do 82 non fose ese o plantexamento, estariamos daquela outra vez diante do BN-PG, con todo o que iso supuxo e conlevou. Eu nin fun nin sería do BN-PG, ollo.

-Ben, pero ¿culpan vostedes á UPG desta mudanza?

-Non vou satanizar a ninguén. Pero o Bloque ten perdido a súa posición orixinal e, dende o meu punto de vista, algo terá que ver quen hoxe ten o control da organización. Insisto, o factor especial do BNG era ter sempre en conta o acordo entre ideoloxías, ademais dos votos individuais. Non é un problema de números, senón de acordos e de consenso, da procura constante dese consenso. Ese é un dos problemas que non se ven.

-¿Pero rachar é a solución?

-Encontro Irmandiño non pretendeu rachar, senón tentar na última asemblea a rexeneración e a refundación. Se le a ponencia política aprobada, verá que aplicándoa poñía a EI fóra do BNG. Hoxe o BNG xa non representa ideoloxicamente a todo espectro nacionalista. E quen dá lugar a isto creo que é quen queda dentro. Iso é o que me leva a unha decisión moi meditada. Creo que debo marchar e tentar construír algo novo.

francisco trigo membro de encontro irmandiño

«Nunca vou falar mal nin teño nada contra do Bloque; sería unha terrible contradición»

«A ponencia política aprobada pola asemblea nacional poñía a EI fóra do BNG»

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
23 votos

«Hoxe o BNG xa non representa a todo o espectro nacionalista»