O BNG impulsa de novo a loita contra os depósitos

la voz

Tralas dúas sentenzas que comprometen a continuidade dos depósitos de Ferrazo, a empresa Finsa-Foresa decidiu iniciar o procedemento para conseguir a avaliación de impacto ambiental desas instalacións. O documento está agora en período de exposición pública, e o BNG non quere que esta circunstancia pase desapercibida. Así que a formación nacionalista non só presentou alegacións contra ese procedemento, senón que onte mesmo rexistraba no Parlamento de Galicia unha iniciativa para tratar de frear a legalización dos depósitos. O Bloque está disposto a «combater con todas as armas precisas a presenza dos depósitos en Vilagarcía ou en calquera outro porto da ría de Arousa», afirmaba onte o deputado Bieito Lobeira.

O BNG sospeita que o goberno do Partido Popular é favorable á consolidación dos depósitos, porque nunca se opuxo a eles. Fronte a isto, lanza unha clara advertencia: «Que non se atreva a legalizar aquelo que un xulgado dixo que era un perigo para a saúde», e engade outro argumento para xustificalo ao dicir que «un goberno democrático ten que estar sempre a favor da sociedade».

Por iso o BNG rexistrou onte mesmo no Parlamento de Galicia unha iniciativa na que lle pide aos grupos que insten ao Goberno galego a por en marcha as accións precisas para impedir a consolidación, o funcionamento e a actividade dos depósitos de hidrocarburos de Ferrazo na súa actual localización.

Ademais, se a súa proposta é aceptada, o gabinete que preside Núñez Feijoo debería dirixirse ao Goberno español co fin de adoptar as medidas precisas para retirar e trasladar fóra da ría de Arousa os depósitos, así como para eliminar o transporte marítimo de hidrocarburos e mercadorías perigosas na ría de Arousa. Estas peticións foron plantexadas na forma dunha proposición non de lei para o seu debate en pleno.

Na exposición de motivos, a formación nacionalista lembra que existen sendas sentenzas do Tribunal Superior de Xustiza de Galicia e do Tribunal Supremo, esta última de carácter firme e non recurrible, que declaran ilegais os depósitos de almacenamento de produtos químicos e petrolíferos do peirao de Ferrazo, por seren tramitados sen a preceptiva avaliación de impacto ambiental. Ademais, os fundamentos xurídicos desta última sentenza recoñecen riscos inasumibles na localización dos depósitos.

Para o BNG «resulta surrealista» que no canto de proceder á paralización, baleirado e traslado dos depósitos, unha decisión que estaría amparada por un mandato xudicial, se abra de novo «a irresponsable opción da súa consolidación e legalización na súa localización actual».

O deputado Bieito Lobeira e o responsable comarcal do BNG, Xoán Allegue, lembraban onte que a seguranza e a saúde dos habitantes de Vilagarcía e o equilibrio ambiental dunha ría que xera 26.000 postos de traballo vinculados ao mar «non se pode por en perigo por intereses empresariais e beneficios privados». Así pois, estamos diante dunha situación de conflito na que «o Goberno galego debe tomar partido pola sociedade, e non por un negocio empresarial».

«Nós imos combater con todas as armas precisas a presenza dos depósitos en Vilagarcía»

Bieito Lobeira

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

O BNG impulsa de novo a loita contra os depósitos