Tres novas xoias para o patrimonio marítimo da Illa

maría santalla VILAGARCÍA / LA VOZ

AROUSA

O «Komaira», o «Adelino Manuel» e o «Rei do Mar», a piques de volver ao mar

26 jun 2011 . Actualizado a las 06:00 h.

A Illa sabe moi ben o moito que lle debe ao mar. Sen dúbida iso ten moito que ver no interese desta localidade pola conservación e pola recuperación do patrimonio marítimo. Dorna, Fasquía, Calmoseira ou Komaira son algunhas das asociacións que xurdiron con este cometido. Son xa moitas as embarcacións tradicionais que volveron navegar grazas ao traballo das xentes que integran estes colectivos, e a todas elas sumaranse nos próximos días outras tres, nas que se traballa arreo para que poidan participar a vindeira fin de semana nos Encontros de Embarcacións Tradicionais de Carril. A Escola de Navegación Tradicional de Dorna, A Calmoseira e a Asociación cultural Komaira son as responsables da volta á vida destes tres galeóns que están a puntiño de volver desafiar as mareas.

Por apenas un ano, o Komaira é o máis antigo do trío ­-falaremos deles por orde de antigüidade para que ninguén se nos incomode-. O Komaira non naceu como Komaira. O seu primeiro nome, cando alá polo ano 1943 bicou por primeira vez a ría desde un estaleiro da Pobra, foi Marcelino. Este galeón a vela foi construído como barco de carga: ás veces levaba area e outros materiais, outras, cargaba o marisco que compraba no mar para vendelo despois nos portos. Desenvolvendo estas tarefas pasou por varias mans, ata que foi mercado pola fábrica Komaira, da Illa, da que colleu o nome que hoxe conserva e onde o seguiron empregando para ir buscar a mercancía ao mar.

Nas bateas

O Komaira rematou a súa vida laboral, como é habitual nos seus conxéneres, como barco de batea, tarefa que desempeñou primeiro na Pobra e despois na Arousa.