Tres formas distintas de enaltecer ás Letras Galegas

begoña paso

AROUSA

14 may 2011 . Actualizado a las 06:00 h.

Os nenos do colexio Torre-Illa celebraron onte a súa particular Festa das Letras Galegas. Fixérono por todo o alto, e nesta ocasión a expresión é literal: bolsas de papel cheas das palabras máis fermosas do noso idioma foron penduradas das alturas, rendindo homenaxe silencioso e elevado a unha lingua apta para a poesía, a ciencia e o que se preste. A actividade naceu do maxín da responsable da biblioteca municipal, Ángela Otero, quen sempre anda a lle dar voltas á cabeza para atopar formas de achegar as letras aos nenos. E, abofé que o consegue.

Mellor xogando

Pero os nenos da Illa non só penduraron das alturas as palabras que máis lles gustan. Abaixo, no chan, tamén andiveron facendo das súas. En toda festa que sexa merecedora de levar tal nome ten que haber xogos. E onte non faltaron na Illa. Os rapaces puideron desfogarse correndo dun lado a outro, participando en divertimentos herdados dos tempos dos seus avós, ou mesmo poñendo a discurrir o seu maxín para conseguir xogar unha partida de bolos no patio do colexio. Pero ollo, que aínda hai máis Letras Galegas na Illa. O vindeiro martes representarase no auditorio da vila unha peza de teatro, O rei Artur e a abominable dama. Para non perderse esta aventura cómpre estar no edificio antes das oito da tarde, hora na que empeza a representación.

Cambados e as frores

Lois Pereiro é o autor ao que este ano se lle adica o Día das Letras Galegas. Pero en Cambados, celebrar esta data é sinónimo de renderlle homenaxe a un dos nosos grandes escritores: Ramón Cabanillas. Onte, uns 300 alumnos de todos os colexios e institutos cambadeses participaron na ofrenda froral que cada ano se realiza diante do busto do poeta da raza. Alí estiveron algúns dos descendentes do escritor: a súa neta Pitusa Vidal, a bisneta Pili Vidal Bernal e o bisneto Juan Botana, as tataranetas Julia Sánchez Alonso e Anxela Botana Alfonso. E incluso os netos dos bisnetos: Iria e Bea.

Presencia institucional

No acto houbo, tamén, representación institucional. O alcalde de Cambados, Luis Aragunde, quedou onte sen a empanada e o polbo que se serviron na aldea labrega da Armenteira co gallo da visita do presidente da Xunta, Alberto Núñez Feijoo. Aragunde non quixo perderse a cita con Cabanillas. Despois de depositar un gran ramo de frores diante do busto do autor, acompañado neste caso polo escritor Ramón Caride, escoitou o recital poético protagonizado polos nenos da vila e que rematou coa interpretación do himno por un grupo do colexio Magariños. De volta ao Concello, de seguro que lle botou un ollo á exposición de paneis sobre Lois Pereiro que se instalou no paseo da Calzada. Hoxe, seguen os actos, con contos e a música de María do Ceo.

¿Cal é a mellor maneira de celebrar o Día das Letras? No Concello do Grove téñeno claro: fomentando o consumo de literatura e libros en galego. Por iso, o acto elixido pola concellería de Cultura para este 17 de maio pasa pola organización dunha nova edición da Festa do libro e a lectura, na que terán unha especial relevancia e proxección os autores locais. O Concello, en colaboración coa Agrupación de Libreiros e Todogrove Edicións, son os responsables dun evento que terá lugar o martes, na Praza de Arriba. Postos de libros, actuacións e sinatura de exemplares serán as principais actividades que se desenvolvan entra as doce do mediodía e as dúas da tarde. Logo a festa seguirá no Corgo, desta volta da man de Cantodorxo.