O BNG aposta por unha saída «xusta» á crise fronte a «dimisión» de PSOE e PP diante do poder financeiro


vilagarcía/la voz.

Esta tarde, a partir das oito e media, a sala de conferencias do auditorio de Vilagarcía acolle un acto protagonizado polo tenente de alcalde, Xosé Castro Ratón, a secretaria nacional do BNG, Monserrat Prado, e o deputado da formación nacionalista no Parlamento galego, Bieito Lobeira. O obxectivo da cita é explicar á cidadanía as alternativas que o nacionalismo galego propón para acadar «unha saída xusta á crise», alén do «tesoirazo de Zapatero e as políticas neoliberais de PP e PSOE».

Onte foi a propia Monse Prado quen, xunta o responsable comarcal do BNG, Xoán Antonio Allegue, e o secretario da CIG en Arousa, Xan Bouzas Tupi , presentaron as principais liñas nas que se fundan as propostas do Bloque. Para empezar, Tupi cuestionou a efectividade das medidas que anuncia o Goberno, posto que «só recortan os dereitos da clase traballadora sen atacar a raíz do problema». Persuadida de que ese problema non se atopa no mercado laboral, a CIG pregúntase que fan a UGT e CC. OO. nas mesas de negociación social, e o Executivo de ZP someténdose aos ditados dos mercados financeiros e organismos coma o Fondo Monetario Internacional, que non controlan ningún goberno democraticamente elixido por cidadáns de ningures».

Esta submisión do poder político, escollido polos cidadáns, a un poder económico rexido só pola súa avaricia constitúe, precisamente, a principal das preocupacións que manifestou a secretaria nacional da fronte nacionalista. Prado aposta por un «cambio radical de modelo económico, sen medidas dirixidas contra as maiorías sociais, traballadores, autónomos, pequenas empresas». As propostas das que o BNG parte, asegura a política arousá, baséanse en aspectos esquecidos polos poderes estatais, coma a loita contra ese 25% do PIB no que se calcula o fraude fiscal imperante no Estado, ou na necesidade de gravar rixidamente figuras coma as sociedades de investimento colectivo e dar prioridade aos sectores produtivos fronte á especulación financeira. Na súa opinión, o que os grandes partidos, PSOE e PP, están a facer nesta grave situación é «dimitir» da súa responsabilidade coma representantes dos cidadáns.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

O BNG aposta por unha saída «xusta» á crise fronte a «dimisión» de PSOE e PP diante do poder financeiro