«A exposición da camelia de Rubiáns vai ter un futuro espero que moi interesante»

AROUSA

05 feb 2010 . Actualizado a las 02:00 h.

Mañá e pasado a parroquia vilagarciá de Rubiáns celebra a segunda edición da Feira-Exposición da Camelia, coa que pretende recordar que os primeiros exemplares que desta flor chegaron á comarca proviñan dunha doazón do duque de Caminha, en Portugal, ao marquesado de Rubiáns.

-¿Teñen xa todo preparado para o fin de semana?

-Pechado de todo non, porque non se pode pechar o tema ata o momento da exposición. Aínda que pedimos que nos avisen, algúns expositores fano a última hora e hai que estar preparados para buscarlles sitio.

-¿Saben cantos expositores van vir?

-Confirmados de fóra de Vilagarcía temos 16, sobre todo da zona de Vigo. De Vilagarcía estamos rozando os cincuenta.

-Polo que vexo hai moita afección á camelia en Vilagarcía.

-En Rubiáns hai moita xente que ten camelias, pero ás veces teslle que insistir para que expoñan. En Vilagarcía tamén hai moita xente que ten tradición de ir a exposicións.

-Sendo Rubiáns tan importante no mundo da camelia, igual habería que potenciar máis esta tradición cara ao exterior.

-Si, neste senso eu creo que vai haber un futuro e eu espero que sexa moi interesante. Pero se iso é así, ímonos ver moi desbordados e moi limitados polo espazo da casa de cultura. Haberá que ver como se fai.