O Establecimientos Otero abre a División de Honra de tenis de mesa recibindo o Club del Mar A Coruña
AROUSA
O Cambados Tenis de Mesa inicia esta fin de semana as ligas nacionais, sete días despois de que os seus conxuntos de categorías autonómicas disputasen o seu primeiro partido da tempada 2009/10.
O Establecimientos Otero cobre o seu primeiro paso na loita pola permanencia na División de Honra medíndose a un Club del Mar A Coruña que conta nas súas filas con dous ex xogadores do cadro cambadés, o chino Zhao Quiang e Juan Enseñat. O chino Liu Junhui volta a ser este ano o baluarte do xogo do E. Otero, acompañado por Adrián Vidal e Eduardo Barreiro, e con Jacobo Enseñat na recámara por se se complican as cousas. O partido é hoxe no Pavillón de San Tomé, ás 18 horas.
Na Primeira División Nacional, o Liceo Casino de Vilagarcía estréase ás cinco na casa co Lugauto-Rábade, mentres o Caixanova Cambados recibe o CTM Cidade de Narón á mesma hora. Alexis Tovar, Ñajo Padín e Fernando Padín defenden as cores do club cambadés.
Na Segunda Nacional, o Liceo Casino Sénior de Vilagarcía estréase mañá na cancha do Monteporreiro ás cinco da tarde.
En canto ás categorías femininas, o Caixa Galicia Cambados desprázase ás catro ao Val do Dubra para enfrontarse ao Dubra Tambre. Gema Cores, Cristina Barreiro e Raquel Martínez forman o cadro arousán.
Na Primeira División Galega, hoxe xógase o Ferretería Vincios-Grupo Barros, e mañá o Charol Complementos-Galmédica, e o Joyería Enrique-Grupo Barros. Os dous últimos, a partir das once da mañá no Pavillón de San Tomé.