O As Torres-Romaría Vikinga remata sexto na xeral da Regata Internacional de Pais de Calais


O Club de Piragüismo As Torres-Romaría Vikinga completou a pasada fin de semana a súa terceira participación na prestixiosa Regata Internacional de Pais de Calais cun máis que meritorio sexto posto na clasificación final por equipos.

Baixo a dirección de Manuel Isorna, o club catoirense defendía o subcampionato na cita francesa, considerada no mundo do piragüismo a máis esixente do calendario europeo invernal. O segundo posto resultou inalcanzable, pero o resultado final é notablemente satisfactorio para unha expedición galega que viaxaba coas importantes baixas de María Pérez, Natividad Busto, Rubén Tobío e Fernando Silva. Os catro, ausentes por mor dos seus respectivos compromisos laborais e académicos.

En Pais de Calais o As Torres competíu con outros 60 equipos procedentes de 16 países do vello continente, incluídas as seleccións nacionais de Gran Bretaña e da ex república soviética de Uzbekistán. O Saint Laurent Blangy, club organizador, foi o vencedor da proba.

A Regata Internacional de Pais de Calais arrincou na localidade de Arras cunha contrarreloxio de 2000 metros na que os seis primeiros se clasificaban para a final A, e do sétimo ao decimosegundo para a final B.

Tres dos 23 padexeiros desprazados polo As Torres accederon ás regatas polos títulos das súas respectivas categorías, xa sobre unha distancia de 800 metros. Brais Martínez colgouse a prata na final de canoa cadete. Diego Romero, pola súa banda, foi sexto no C-1 Sénior masculino, idéntico posto ao acadado por Diego Miguéns na canoa júnior.

Outros oito piragüistas do equipo catoirense accederon ás finais de consolación. No C-1 Sénior masculino, Ismael Pesado e Miguel Salgado coparon por esta orde as dúas primeiras prazas. Pedro Ferro, en K-1 Júnior, impúxose na súa final B, co seu compañeiro Marcos Barreiro finalizando undécimo da xeral. Antonio Lobato asinou o noveno posto no cadro de competición da canoa júnior. Anxo Galbán e Pablo Cudillero foron noveno e duodécimo no C-1 Cadete, respectivamente. E Marta Conde liderou os resultados das damas do Baixo Ulla cunha segunda praza na final de consolación cadete (oitava da xeral).

Ademais, Gloria Silva (K-1 Dama Sénior), Daniel Vázquez (K-1 Cadete) e César Lombera (C-1 Cadete) quedáronse ás portas das súas respectivas finais B, con sendos decimoterceiros postos.

O coordinador deportivo das Torres-Romaría Vikinga e responsable da expedición a Francia, Manuel Isorna, manifestou á volta da viaxe que «estou moi contento coas sensacións que traemos para casa, xa que este ano o nivel da regata era moi alto, e o rendemento dos nosos deportistas foi excelente, mellor incluso do agardado a estas alturas», a un mes do inicio da tempada.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

O As Torres-Romaría Vikinga remata sexto na xeral da Regata Internacional de Pais de Calais