O Extrugasa Río Ulla soubo sacar partido da súa condición de local, facéndose a pasada fin de semana cunha das dúas prazas de ascenso á Primeira División Zonal na final a catro desputada no polideportivo municipal de Pontecesures.
O conxunto local impúxose na noite do sábado ao McDonalds Vilagarcía por un axustado 66-60 na segunda semifinal da xornada, nun encontro que o Extugasa Río Ulla comezou gañando por quince puntos (18-3, minuto 8). Horas antes, no mesmo escenario, o La Noche Baloncesto Portonovo non tivo excesivos problemas para superar no seu cruce o Cafetería Don Manuel de Cuntis: 94-78.
Xa co pasaporte á Primeira Zonal na man, Extrugasa Río Ulla e La Noche Baloncesto Portonovo víronse as caras na tarde do domingo. No partido polo título da Segunda Zonal Arousá, os locais acabaron notando máis o desgaste nos sete derradeiros minutos, nos que o Portonovo se levou o choque cun parcial de 0-12 que convertía un 48-44 no 48-56 final.