Antonio López: «O Obradoiro é a milagre de cada ano»

Son do Obra O reitor, asiduo en Sar, louva a capacidade de reconstrución do equipo

.

santiago / la voz

Antonio López, o novo reitor da Universidade de Santiago, é tamén un afeccionado do Obradoiro asiduo aos partidos en Sar. Xa lembra, de rapaz, ter visto encontros no vello pavillón, «dun xeito máis esporádico». O que lle quedou máis marcado na memoria foi un diante «do Madrid de Delibasic». E cando bota a vista cara atrás rescata, noutro senso e sen o Obra de por medio, un día que se cruzou no Preguntoiro «con Belosteny», sendo un mozo.

Sempre lle gustou o baloncesto. Co tempo, as súas fillas practicárono no Pío XII e no Rosalía, e cando o Obradoiro desembarcou na ACB apuntáronse en familia. Aí seguen.

Antonio López, catedrático de Dereito e outrora presidente do Consello de Contas, fala da súa paixón polo equipo coa pedagoxía de quen está afeito a facerse entender, de quen sabe escoller a mensaxe. Por iso, cando se lle pide un esforzo de síntese para definir o que é para el o Obra, tómase tempo, empeza por algunha reflexión e finalmente resume nunha frase: «Quedaríame coa conexión coa afección, con esa atmosfera que se crea co Miudiño, que é un aceno de identidade... Pero o máis incrible é ver como renace cada ano, esa capacidade que ten para reconstruírse. É a milagre de cada ano».

De xeito natural, case sen pretendelo, vai tirando do fío e acaba facendo un pequeno tratado: «Hai máis cousas que chaman a atención, como ver que se está convertendo en porta de entrada ao baloncesto europeo para moitos xogadores. Outra milagre é sosterse sen apenas axudas públicas. Non hai máis que ver onde foron parar outros clubs cando quedaron sen ese financiamento. Ten moito mérito, porque o deporte profesional é moi caro e custa moito atopar recursos».

Antonio López recoñece que «as vitorias diante dos grandes deixan un sabor distinto», aínda que goza de cada partido. E reclama a atención sobre un punto da afección que lle chama especialmente: «A xente é moi respectuosa co rival. Esas ovacións para xogadores que se fixeron aquí e volven a Sar con outra camiseta son impensables noutros deportes. Todos queremos que gañe o noso equipo. E iso é compatible cunha forma de ver o deporte moi agradecida».

«Unha señora achegouse e díxome que a ver como facía agora para suspendelos»

Máis aló das reflexións xerais, o novo reitor tamén ve no Obra un compoñente de proximidade que o fai distinto e que lle permitiu gozar dunha vivencia que nunca esquecerá e que tamén lembrarán quen a pasada tempada acudisen ao partido en Sar diante do Joventut. No descanso, un grupo de estudantes de Dereito sorprenderon ao profesor, en metade da cancha, para que fose o seu padriño de promoción.

Antonio López rememora como se foron dando tódolos pasos: «Sempre que podo vou aos partidos do Obra. E aquela semana, non sabía por que, varios alumnos preguntábanme se ía ir ao do Joventut, e cando lles dicía que si máis dun comentaba que nos veriamos alí. O día do encontro atopei a varios na porta. Non sospeitaba nada, aínda que me soaba algo raro. No descanso, o speaker empezou a falar dun xogo novo, íase achegando á zona onde estou eu... E cando me estaba mirando, empecei a pensar que me argallaran algo para que tirara a canastra dende o medio do campo, ou algo así. E cando din media volta e os vin a todos alí, detrás dunha pancarta...».

No deixa pasar dous detalles a carón daquela anécdota. Un remite ao día do partido, ao rematar: «Unha señora achegouse a min e díxome que a ver agora como facía para suspendelos. Afortunadamente, puxéronmo sinxelo». A outra apunta as xornadas posteriores: «Déronme máis popularidade aqueles dez minutos en Sar que todo o tempo que pasei no Consello de Contas».

Na grada mellor que no palco

Xa pensa no que está por vir, na nova tempada, que arrancará coa Supercopa, e en gozar dende a súa bancada: «Algunha vez téñenme invitado ao palco. Non é o mesmo. Prefiro o meu sitio. Eses saltos cunha canastra, esa liberación, é algo fenomenal».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
13 votos
Comentarios

Antonio López: «O Obradoiro é a milagre de cada ano»