O persoal da piscifactoría que a empresa Insuíña ten en Xove decidiu en asemblea celebrada o pasado mércores, día 22, levar a cabo accións de protesta para exixir o inicio da negociación dun convenio de empresa. A primeira acción terá lugar este xoves 29 e consistirá nun paro de dúas horas (de 12:30 a 14:30).
O comité de empresa de Xove, e os delegados de persoal da factoría de Mougás, explican que solicitaron por escrito á empresa a principios de ano «a constitución da comisión para a negociación dun convenio colectivo de empresa. A dirección xustificou a non convocatoria pola negociación que se estaba levando a cabo dun convenio de Acuicultura de ámbito estatal. Pero a pesar de que dita negociación xa se pechou e foi publicada no BOE, a empresa segue sen convocar á comisión negociadora», afirman.