O CEIP Plurilingüe de Covas acolleu a primeira xuntanza de todos os cursos de sexto de Primaria dos municipios de Viveiro e O Vicedo
VIVEIRO
A cita foi organizada por Bibliocovas para que os rapaces se coñezan antes de compartir instituto o próximo curso
03 jun 2026 . Actualizado a las 14:00 h.O CEIP Plurilingüe de Covas, en Viveiro, acolleu este mércores a primeira xuntanza de todos os cursos de sexto de educación Primaria dos municipios de Viveiro e O Vicedo. A Bibliocovas organizou esta xornada de convivencia co obxectivo de proporcionarlles un lugar de encontro con actividades diversas antes de ser compañeiros e compañeiras nos IES María Sarmiento e Vilar Ponte. O alumnado de sexto está esgotando os días de compartir cun grupo que, na maioría dos casos, leva xunto desde Educación Infantil. «Fánsenos maiores e están expectantes diante do gran cambio. A emoción de poder compartir e coñecerse axudará a suavizar os nervios de ser os peques do insti. Desde o cole de Covas gustaríanos que esta actividade se celebrase todos os anos e fora rotando polos diferentes coles participantes. A semente está posta!», destacan desde o colexio que dirixe Leyla López Seijido.