Desleixo S.A. en Viveiro


Teño para min que se os descendentes do capitán Xoán Dutton e Aguiar, fillo de Dutton o Vello, se achegasen un día destes desde Inglaterra até Covas, habían comprobar o desleixo no que está desde hai ben tempo o antigo pazo de Grallal.

O portalón da entrada principal, o que linda con Inglaterra mar por medio e que sae fotografado nas guías do Concello de Viveiro ten, no frontón, o relevo do busto de Dutton oculto pola hedra. A ambos os lados da porta hai dúas bólas decorativas, unha delas, a da esquerda, está fendida e arrombada na entrada desde hai moitos meses sen que ninguén lle bote unha man para a restaurar. En resume: a desidia, o descoido, a incuria ou como prefiran calificalo, na mesma entrada dun edificio singular.

O da S. A. (Sociedade Anónima) do título é porque un servidor non foi quen de poder concretar o nome dos socios responsábeis de tal abandono. Tamén podería levar un S. L. (Sociedade Limitada) que, neste caso, indicaría a nula disposición-unha limitación en si mesma-que están a demostrar os responsábeis de manter en bo estado a entrada deste Ben catalogado e ?teríamos que supór-protexido por Patrimonio. Ou se cadra, as siglas máis acaídas para o nome desta empresa, poderían ser o C e o B (de Comunidade de Bens). En fin, sexa como for, o que teño clarísimo é que isto é unha neglixencia e unha vergoña. Ou non?

Quen ten que tomar medidas para que remate esta vergoñenta situación? A señora alcaldesa?, a concelleira de Turismo?, o concellleiro do Mar ( por aquelo do «mar por medio»)? , os de Patrimonio da Xunta?, o señor bispo de Mondoñedo?, o ex cura párroco de Covas?, un familiar de…?, esta ou aquela ONG?. Simplifiquemos: esta é unha situación doada de amañar cunha retirada da vexetación que tapa a entrada principal, unha reparación da peza ornamental, un adecentamento da aferruxada porta…

Que pasten no pomar ovellas e cabras, que trote polos xardíns un cabaliño ou que anden ceibos cans e gatos, é o de menos. Animaliños desta caste xa os había nos tempos de Dutton. Mais sexa quen sexa o responsábel de tal deixamento isto hai que resolvelo. E mentras non se faga poden ir pondo a remollo as guías turísticas de Viveiro até que se repare isto, non vaia a ser que guiados por elas as visitas que se acheguen até o portalón de Grallal leven unha desagradábel surpresa.

Francisco Luís R. Guerreiro é militante do BNG, exconcelleiro durante lustros e extenente de alcalde de Viveiro.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
18 votos
Comentarios

Desleixo S.A. en Viveiro