Viveiro aberto ao mar

O delegado da Xunta na provincia defende as obras no muelle vello e critica ao Concello


O pasado xoves culminaba un proceso complexo e longo polo que a Xunta dotaba á cidade de Viveiro de máis de 300 prazas de aparcamento público e gratuíto a escasos metros do centro histórico. Un novo servizo que permitía o aproveitamento de máis de 8.000 metros cadrados do peirao antigo, hoxe sen usos portuarios.

 A Xunta atendía así unha demanda social e comercial e facía fronte tamén a un compromiso adquirido polo Goberno de Feijóo para corrixir a falta de iniciativa doutras administracións incapaces de crear novas prazas de estacionamento gratuíto pese a que para todos era evidente que se trataba dunha das principais carencias da cidade.

 Hai quen pode discutir tempos e ritmos, quizais porque non é sinxelo trasladar a complexidade dun longo procedemento que obrigou ao rescate de concesións en vigor, en moitas das 12 naves que ocupaban o espazo que hoxe é unha explanada, libre, ampla e ao servizo da veciñanza.

 Tamén hai quen nin come nin deixa comer, amosando pouco respecto institucional e unha demagoxia desbordante. A alcaldesa pediu expresamente que non iniciásemos as obras durante a Semana Santa e sabía que, polo prazo de execución dos traballos, non era posible ter a zona aberta durante o Resurrection Fest ou o Mercado Renacentista. Priorizou un evento sobre os outros e agora nos critican por atender a súa petición. Sen esquecer que a Xunta foi quen de ofrecer zonas de aparcamento alternativo no tempo no que duraron as obras.

 Non ten sentido insistir en polémicas que enturben unha realidade: o Goberno de Feijóo foi quen de cumprir a súa promesa de multiplicar os espazos de aparcamento gratuíto na cidade e eliminar as naves recuperando unha imaxe espectacular da ría, poñendo en valor unha paisaxe extraordinaria. Un paso decisivo nun proceso, o de rehabilitación da fachada, co que seguimos comprometidos: por un Viveiro aberto ao mar.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Viveiro aberto ao mar