«Non estaría disposto a vivir separado da miña familia pola actividade política»

Entrevista ao candidato do BNG á alcaldía de Ribadeo, Fernando Suárez Barcia


ribadeo / la voz

Alcalde de Ribadeo desde o 2007, Fernando Suárez volve encabezar a lista do BNG de Ribadeo para optar a un cuarto mandato.

-Onde vive? Casa propia ou alugada?

-Vivimos en casa propia. Con hipoteca. Aínda lle quedan 13 anos.

-Cantas horas dorme ao día? Que soñou hoxe?

-Non menos de seis e non máis de sete. Adoito deitarme á medianoite e aproveito para ler cousas non relacionadas co traballo. Case nunca lembro o que soño.

-Ve a televisión? Series, cine, informativos, documentais...? Ten plataformas de pago?

-Da televisión vexo os noticiarios e documentais, especialmente os relacionados coa historia. Tiven plataforma de pago, pero agora xa non.

-Que libro volvería a ler?

-Pois un libro que me marcou moito cando era un adolescente. Arredor de si, de Otero Pedrayo, membro da Xeración Nós e dos vellos galeguistas que axudaron a conformar a conciencia de país. Un país orgulloso de si mesmo e aberto ao mundo!

-Cando foi por última vez ao cine? Lembra a película?

 -Agora que os pícaros foron medrando e xa son uns adolescentes, podemos a miña muller e máis eu, voltar ao cine. A última foi no Cine de Ribadeo. Greenbook, sobre a loita contra os prexuízos raciais na América profunda dos anos sesenta. Seguramente hoxe poden seguir vivas este tipo de absurdas estigmatizacións en moitos aspectos no mundo: por razóns de lingua, de xénero, etc.  

-Se lle desen a elixir, con quen tomaría algo agora mesmo?

-Pois ocórreseme que me gustaría chamar a Quintana, Pontón, Beiras e Villares, convidalos a unha ronda e dicirlles: Até cando pensades que este país vai aguantar sen que nos poñamos de acordo con tanto que temos en común? Por suposto que á ronda pagaríaa eu (RISAS).

-Café, caña, refresco, viño...?

-Calquera dos catro, aínda que é mais frecuente en min o primeiro.

-A cal dos outros candidatos convidaría?

-Pois a calquera dos catro. Evidentemente con algún ou algunha tería mais que falar que con outros.

-Cando foi por última vez a cear con amigos?

-Non hai moito xuntámonos uns amigos que estudamos xuntos e que conseguimos arraigar o de vérmonos de cando en vez para cear e tomar unha (ou dúas). Máis non, que logo sentan mal (RISAS).

-Bote a vista atrás. A que lugar ou momento volvería?

-Teño moitos momentos aos que voltaría. Pero penso que a vida é un contínuum e que sempre hai que mirar cara adiante, sen esquecer quen somos e de onde vimos. Aprender da experiencia e proxectalo cara ao futuro.

-Ten coche? Cal e desde cando?

-Na casa temos dous. A miña muller e mais eu utilizámolos indistintamente. Temos un Peugeot 5008 mercado no 2010. Recentemente cambiamos o meu querido Opel Astra do ano 2000 porque xa non deu mais de si. No seu lugar mercamos outro Opel, neste caso un Insignia, de segunda man e con 90.000 quilómetros, aínda que en moi bo estado. A ver se cumpre como o fixo o seu antecesor.

-Ten seguro privado de saúde? E cantas tarxetas bancarias?

-Só dispoño da Seguridade Social. Sempre que tiven que acudir a ela respondeume moi ben. Outra cousa é a precarización que estes gobernos terribles do PP están a facer con ela, precarizándoa, colapsándoa e abrindo a porta a que a xente vaia dafeito á privada. Pero non llelo imos permitir. En canto ás tarxetas bancarias, pois unha de crédito e outra de débito.

-A que non estaría disposto a renunciar pola súa actividade política?

-Se falamos en termos afectivos non estaría disposto a vivir separado da miña familia. Se a pregunta é en termos de moralidade, diría que nunca prescindiría da honorabilidade.

-Cal é a súa festa preferida en Ribadeo?

-Pois ten unha resposta doada desde hai seis anos: O Ribadeo Indiano. Sempre poño o exemplo que foi como Alexander Flemming descubriu a penicilina: Por casualidade. Unha salvou moitas vidas e outra puxo a Ribadeo de modelo dunha festa transversal, para todas as idades, que comprende actividades históricas e lúdicas, é elegante, e aínda por riba, como imos de branco, a ninguén se lle ocorrería facer botellón.

-Que será o primeiro que fará o 27 de maio?

-Saír á rúa pola mañá, tomar un café e ler a prensa, e pase o que pase, falar coa xente pola rúa, como me gusta e sempre fixen.

«Con nós non vai haber sorpresas. Todo o mundo sabe como traballamos e gobernamos»

Tras responder ao test moi persoal, chega a clave política.

-Por que se presenta?

-Porque non me gusta deixar as cousas a medias e houbo moita xente que nolo pediu. Temos que completar o traballo feito nestes anos, que penso humildemente que foi moito, pero non nos conformamos. Queremos máis, queremos seguir transformando Ribadeo. Eu e o meu equipo, igual que todos os ribadenses, querémoslle ao noso pobo e queremos velo mellor cada día. Se eu podo contribuír a iso, aí estarei. 

-A que pode comprometerse cos veciños?

-A non cambiar. A seguir gobernando como o fixemos até agora, escoitando a todo o mundo e gobernando para todo o mundo, con humildade e con dedicación.  

-A súas tres principais prioridades para Ribadeo son?

-Neste mandato conseguimos a Residencia, que foi un logro de todo Ribadeo. Pero agora tenlle que tocar o turno ao Hospital-Asilo. Tamén temos un pavillón novo, estamos a investir no Pepe Barrera, pero agora queremos desenvolver as posibilidades do Plan Xeral e crear novos espazos públicos para deporte e lecer. En terceiro lugar, melloramos moito os accesos a Ribadeo, pero queremos seguir nese camiño. 

-De saír elixido, cal sería a súa primeira decisión?

-Reunirme coa Xunta para que deixe de seguir bloqueando a modernización da traída de auga que afecta a Ribadeo e a Trabada. Por moito que o alcalde de Ribadeo non sexa da corda do señor Feijóo, non ten dereito a castigar aos veciños e veciñas de Ribadeo.

-Se non houbera maiorías absolutas, plantéxase pactos?

-Calquera partido que queira axudar a que Ribadeo mellore, sumar, será benvido. Pero aspiro a volver ter a confianza maioritaria dos veciños e veciñas para poder contar cun Goberno forte e unido como o que Ribadeo tivo neste mandato. A Ribadeo foille ben. 

-Que lle pediría aos ribadenses o 26M?

-Que votaran libremente pensando no mellor para as súas familias, as súas parroquias ou a súa vila, que reflexionen se merece a pena poñer en risco a transformación que se produciu en Ribadeo. Con nós non vai haber sorpresas. Todo o mundo sabe como traballamos e como gobernamos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
10 votos
Comentarios

«Non estaría disposto a vivir separado da miña familia pola actividade política»