«Ver no escenario que unha nai mata ó seu fillo ionqui afecta, molesta»

lucía rey O VALADOURO / LA VOZ

O VALADOURO

Xesús Pisón (O Valadouro, 1954). Creador polifacético, é autor de numerosas obras de teatro e ensaios. É gañador, entre outros, do Premio de Teatro da Escola Dramática Galega JOSE MANUEL CASAL

Os dramaturgos Xesús Pisón e Manuel Lourenzo preparan con actores non profesionais do Valadouro a obra «Materna», cuxa estrea terá lugar venres 5 ás 20.30 horas na Casa da Cultura de Ferreira

03 ago 2022 . Actualizado a las 05:00 h.

«Que un director teatral como Manuel Lourenzo, que para min é o mellor de Galicia e o mellor formador de actores; e non só por como monta a obra senón por como lles descobre o que é a vida, e que leva traballado con actores profesionais e el como actor en series como Fariña, por exemplo, tivese a idea de representar esta obra aquí, no lugar onde nacemos e con actores do Valadouro non profesionais, é marabilloso. Estamos entusiasmados!». Con esta emoción resume Xesús Pisón (O Valadouro, 1954) o espírito que envolve «Materna», a obra de teatro que os dous dramaturgos naturais do Valadouro levan semanas preparando nunha aula de Alfoz e que será estreada este venres, 5 de agosto, na Casa da Cultura de Ferreira ás 20.30 horas, da man do Clube Teatral Elsinor.

Regístrate gratis y recibe cada mañana en tu correo las principales noticias del día

Manuel Lourenzo (O Valadouro, 1943). Escritor, director e actor teatral, ademais de profesor e conferenciante. Dirixe na Coruña, con Santiago Fernández, o estudo teatral CasaHamlet Ana Garcia

Dirixida por Manuel Lourenzo (O Valadouro, 1943), está baseada nunha serie de monólogos publicados por Xesús Pisón na Revista Galega de Teatro sobre o mundo da maternidade. «Trata o mundo da maternidade no mundo de hoxe e todos os conflitos que pode ter ou ten unha nai actual cos fillos no sistema no que vivimos, no modo de vida occidental. Conflitos nos que ás veces son vítimas os fillos, ás veces as nais, ás veces ninguén, ás veces os dous...», sinala Pisón.

As actrices locais Sabela Quirós, Inma Orol, Leni Níñez, Susi Paz, Dora Vizoso, Milagros Chao, Moncho da Lomba e Pepa Lorenzo interpretarán impactantes monólogos. Da produción ocúpase Montserrat Modia. «Hai diversas situacións e nelas cada personaxe, cada muller, conta un drama que lle tocou vivir. Porque isto é un drama, non é comedia. Son dramas que á xente lles van impactar, pero eu practicamente non inventei nada», sinala Pisón, que indica que calquera suceso que se vai ver sobre as táboas pódese encontrar no xornal. «A xente ve estes sucesos no xornal e pasa a páxina, non lle afecta. Pero ver no escenario que unha nai mata ó seu fillo ionqui afecta, molesta. Algunha xente dime: ‘Como te pasache!’, pero eu digo: ‘Eu non me pasei, pasouse a vida’», engade.

—Por que pensa que o mesmo suceso lido na prensa «non afecta» ou «afecta» uns segundos, e representado no teatro axuda a remover conciencias?

—O teatro obriga a reflexionar porque cando pos algo diante dos ollos nel molesta e pensas: «Pero somos así realmente». Si, somos así de salvaxes, e estas cousas pasan diariamente. O teatro é unha arte moi molesta porque che devolve o golpe. Ensínanos caras que non nos gusta ver de nós mesmos. E con esa función naceu o teatro en Grecia. Por iso é unha arte que non se leva ben co poder. Poder e creación son cousas antagónicas. Do teatro saes moitas veces tocado, emocionado, pero desta obra, e eu son o autor, hai textos que os vexo ensaiar e saltan as bágoas. Hainos moi tenros, nos que axiña empatizas co muller, pero hai outros moi duros de ver.

«Algunhas actrices fixeran teatro aquí, ruralista, cómico..., e ó ser dirixidas por Manuel Lourenzo, alucinan, están respondendo moi ben», Xesús Pisón, dramaturgo

«Materna». A obra baséase nunha ducia de monólogos sobre a maternidade publicados por Pisón na «Revista Galega de Teatro».

Alfoz e O Valadouro. Tras ser ensaiada en Alfoz, a peza será estreada en Ferreira.

A obra será representada este mes noutros puntos da comarca

Xesús Pisón sinala que os monólogos de Materna (dos 20 publicados orixinalmente Lourenzo seleccionou 12 para representar) condensan parte da esencia e da natureza humana, con independencia do tempo e do espazo. «Son criaturas que contan o seu drama. Non se sabe moi ben onde están, non se sabe moi ben que espazo ocupan... Proceden de diversas vidas, pero conflúen aí. Son mesmo de tempos diferentes, de distintas idades e distintas épocas. Hai unha que fai referencia ó Hamlet de Shakespeare, e estamos falando do século XVII. A unha personaxe que non existe na obra, que é a nai de Ofelia, pero que aquí aparece. Tamén aparece outra personaxe literaria que é a noiva de Víctor Frankenstein, do século XIX», engade o dramaturgo.

Ó longo do mes de agosto, Materna chegará a diferentes escenarios da comarca mariñana. «Non sabemos como vai reaccionar a xente porque parte do público está acostumado a ver comedia, hai xente relixiosa para a que vai ser duro..., pero non quero facer un teatro de rebaixas porque iso si me parecería miserable», sinala Pisón. Destaca que a Lourenzo e máis a el lles gustaría que a finais de agosto, cando remate a xira «desta fermosa experiencia», os actores, «que nunca cobraron por facer teatro, cobren algo». «O teatro debe ser pagado», conclúe.