Cunqueiro sempre

Rexina Vega recibirá hoxe a distinción como «Cunqueiriana de Honra»

Busto e imaxes de Cunqueiro, na casa-museo dedicada a el en Mondoñedo
Busto e imaxes de Cunqueiro, na casa-museo dedicada a el en Mondoñedo

Tal día coma hoxe, hai agora exactamente corenta anos, íasenos o grande Álvaro Cunqueiro. Estaba a piques de cumprir os setenta anos, o que, para as esperanzas medias de vida das que arestora gozamos, sería un pasamento abondo temperán. Mais o seu foi un tempo vital aproveitado coma poucos e, na historia da literatura galega, a súa figura é unha estrela que brilla con luz incomparable.

Cunqueiro, que nacera en Mondoñedo en 1911, foi poeta e articulista na Preguerra, novelista, dramaturgo, autor de versos e xornalista de profesión na Posguerra e aínda tivo vagar para converterse en gastrónomo de referencia e

autor das máis populares guías de viaxes pola nosa terra.

Finou en Vigo, naquel fatídico sábado do 28 de febreiro do 1981, e foi trasladado logo ao seu Mondoñedo natal, onde repousan os seus restos no Cemiterio Vello da cidade, nunha campa que garda o máis célebre dos epitafios galegos: “Eiquí xaz alguén que coa súa obra fixo que Galicia durase

mil primaveras máis”.

 

Primavera inmorredoira

E abofé que así é e que esa primavera inmorredoira segue entre nós.

Mentres les estas liñas, en Mondoñedo estamos a conmemorar a súa efeméride. E facémolo depositando flores diante da súa tumba, porque cremos,

coma el, que son certas esoutras palabras que tamén alí figuran insculpidas e que é unha gloria ser deste noso pobo e formar, coma el, parte da súa tribo: “Loubado seña Deus, que me permitiu facerme home neste grande reino que chamamos Galicia”.

 

Memoria do seu legado

Cumprimos, pois, coa manda da ofrenda floral. Mais tamén celebramos a memoria do seu legado coa entrega da distinción como Cunqueiriana de Honra á profesora Rexina Vega, grande estudosa da súa obra, quinta das

personalidades designadas con este honor que, antes dela, xa recoñeceu o labor doutros persoeiros como Darío Villanueva ou Víctor F. Freixanes.

Escribo estas palabras a poucas horas dese momento e sei, sen dúbida ningunha, que Rexina Vega nos agasallará con verbas en ardora, luz que iluminará todo o val da Mariña e que ficará para sempre aboiando no ar da antiga Vallibria.

A canda ela estarán todas as autoridades municipais, representantes da administración provincial e tamén autonómica e, xaora, tantiños mindonienses que a axudaremos no maratón de lectura pública que ha principiar coas

maxistrais maxinacións de El año del cometa.

 

Colección Selva de Esmelle

Á xornada ponlle o ramo a presentación da Arqueoloxía cunqueiriana de Abel Vigo García, doutor en Arqueoloxía e técnico de Cultura no Concello de Mondoñedo, unha nova entrega da Colección Selva de Esmelle, cadernos promovidos pola Casa-Museo Álvaro Cunqueiro que contan xa con outros títulos de César Cunqueiro (Cunqueiro e Lezama), Víctor F. Freixanes (Unha xigantesca primavera) e Miguel Somovilla (O labirinto do Imperio Secreto). Ao carón de Vigo García han estar o amentado César Cunqueiro, tamén el escritor e fillo do eximio mindoniense, Felipe Debasa, historiador e profesor da Universidade Rey Juan Carlos de Madrid, e servidor. Xuntos abraiarémonos

 

polos descubrimentos que confirman que o inmoble no que asenta a CMAC é, en realidade, unha vivenda milenaria, que ten as súas orixes na época tardorromana, como demostran os restos atopados durante as campañas de

escavación e restauración da casa, o que confirma que Cunqueiro foi o máis insigne dos fillos dunha estirpe que viviu no corazón mesmo dun val no que as

xentes levan vendo pasar os traballos e os días máis das mil primaveras das que el falou e que seguirán a facelo, de seguro, outro tanto tempo mercé á súa obra e á nosa memoria colectiva, que non o esquece corenta anos despois,

porque “soio volven os que recordan, compañeiros”.

* Armando Requeixo, crítico e escritor, é tamén coordinador de actividades e publicacións da Casa Museo de Álvaro Cunqueiro.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Cunqueiro sempre