Armando Requeixo: «O noso obxectivo é que a Casa Museo de Cunqueiro sexa un catalizador de eventos»

O estudoso, crítico e escritor é o encargado desa nova tarefa, a proposta do concello mindoniense e da alcaldesa


mondoñedo/la voz

O estudoso, crítico literario e escritor mindoniense Armando Requeixo acolle cos brazos abertos un cometido ao que está ligado emocional e culturalmente. Coordinará actividades e publicacións da Casa Museo Álvaro Cunqueiro.

-Como naceu esta proposta?

-O Concello de Mondoñedo e no nome da alcaldesa Elena Candia quixeron facer que a Casa Museo de Cunqueiro, que é un continente fabuloso e leva uns meses abertos con moito éxito de público, fose tamén un lugar de encontro da palabra e da memoria e do herdo do persoeiro que alí está honrado Álvaro Cunqueiro. Habendo un continente queríase tamén que a casa tivese un contido literario que espallara e potenciar aínda máis a presenza de Cunqueiro na propia casa, en Mondoñedo e en toda Galicia. Con ese fin procuraron alguén que puidera botar unha man e ser de axuda pola querenza á figura inmensa de Álvaro Cunqueiro, polo coñecemento tamén da súa vida e obra e tamén pola complicidade, en moitos sentidos, que eu poido ter ao lugar ao ser tamén mindoniense. Depositaron en min a confianza para que eu fose o coordinador de actividades e publicacións.

-Cales serían as liñas mestras desta nova función?

-O obxectivo é programar actividades que dalgunha forma poidan servir para que a Casa Museo se converta nun catalizador de eventos que sirvan non só para escaparatizar o traballo da propia Casa Museo, senón ademais para profundar ou seguir mantendo absolutamente viva a figura e o legado de Álvaro Cunqueiro.

-Xa hai algo planificado?

-Pensamos nunha batería de actividades inicial. Deseñámola pensando que este trienio que agora vai comezar está balizado por dúas datas esenciais na propia vida do escritor, que son o 22 de decembro a do seu nacemento e o 28 de febreiro a do seu pasamento, para botar a andar. Para presentarnos en sociedade no circuíto cultural e literario de Galicia; será, digamos, o noso saúdo da Casa Museo como plataforma cultural. O que ideamos para ese primeiro período é levar adiante unha serie de conferencias, un pequeno ciclo, «Cunqueiro aquí e acolá», no que trataremos de que un persoeiro ilustre ou significado no seu mundo poda impartir unha conferencia o día do seu nacemento e outra no do seu pasamento, e unha actividade intermedia para o mes de xaneiro tal vez. Ese miniciclo pode optar á fórmula de conferencia maxistral ou ben de mesa redonda e que haxa un coloquio co público. Ademais, está na nosa intención comezar a publicar materiais cunqueirianos e moi particularmente uns cadernos de ensaio que bautizamos como Colección Selva de Esmelle, na que imos publicar textos e ensaios de extensión breve ou mediana arredor da vida e obra de Cunqueiro. Queremos comezar esa serie cun texto que está ultimando para nós o propio fillo do escritor, César Cunqueiro.

-O mellor comezo!

-Empezaremos cun comezo exponencial, é dicir, un Cunqueiro ao cadrado, un Cunqueiro falando de Cunqueiro. É un comezo bonito. Logo solicitaremos ensaios a estudosos e persoas vinculadas á figura de Cunqueiro que irán sendo publicados coa periodicidade que nos sexa posible. Mesmo algunhas das conferencias intentaremos tamén recollelas nesa colección. Á vez, temos avanzado o esqueleto ou idea de publicar una Revista de Estudos Cunqueirianos onde teñan cabida textos de toda natureza que teñan que ver co mundo de Cunqueiro.

-Con que apoios contarán?

-O Concello de Mondoñedo, Deputación Provincial de Lugo, Secretaría Xeral de Política Lingüística da Xunta de Galicia, a familia do escritor e Fundación Penzol de Vigo, que é a depositaria de boa parte do legado do escritor. E tenderemos pontes e crearemos sinerxias tamén coas outras plataformas asociativas e institucións do país.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Armando Requeixo: «O noso obxectivo é que a Casa Museo de Cunqueiro sexa un catalizador de eventos»