Alicia, silencio


Despediuse ás caladas, como sempre viviu e obrou, Alicia Tella-Villamarín Ferreiro (Doncide, Pol, 1938-Mondoñedo, 2019).

Estudou Maxisterio, aínda que nunca exerceu a profesión. Chegou a Mondoñedo con apenas seis anos, primeiro por amor á súa tía Alicia, esposa de Pepe Cunqueiro, irmán de Álvaro, muller que morreu nova e sen descendencia e á que a sobriña substituíu nos coidados ao seu tío e padriño, último alcalde republicano de Mondoñedo, José R. Villamarín Pallín.

En Mondoñedo, por amor

E quedou en Mondoñedo xa para sempre por amor ao profesor e escultor valenciano Juan Puchades Quilis, a quen coñece a principios da década dos 60 e co que casa en 1967. Teñen dúas fillas, María Jesús e Alicia. Foi a responsable da Biblioteca Municipal Pena Trapero de Mondoñedo desde a súa creación en 1981 ata a súa xubilación, no 2003. Colaborou en múltiples actividades relacionadas coa literatura e coa historia cultural de Mondoñedo, e participou na creación de cabeceiras literarias e culturais como Monfadal; recuperou exemplares de prensa histórica editada en Mondoñedo para a biblioteca, e promoveu todo tipo de iniciativas que tivesen que ver cos libros e coa lectura.

Extraordinaria persoa, humilde e discreta

Ademais, foi unha excelente, extraordinaria persoa; humilde, discreta, sempre disposta á axuda, leal e entregada a todas as cousas da humana xente. Con Juan Puchades, musa sempre xenerosa. Coa familia Cunqueiro, por razóns familiares e afectivas, especialmente con Carmiña, atenta ata un infinito que ela, sabéndose necesaria, descoñecía.

Foise Alicia, en silencio, como sempre andou pola vida; sixilosa, cariñosa, entregada, atenta, querida, sensible, amante do Mondoñedo egrexio, soñador e sempre esperanzado! Somos moitas e moitos os que lle debemos memoria, os que aprendemos que querer non é máis que un desexo, unha vontade!

Foise Alicia!

Mondoñedo repica o silencio inabarcable da súa memoria! Apertas, prezado Juan, prezadas María Jesús e Ali! Alicia sempre vai estar en nós, e nós con vós e con ela!

Un bico!

* Antonio Reigosa, escritor. Cronista Oficial de Mondoñedo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Alicia, silencio