Lourenzá celebra as Letras Galegas para Fernández del Riego: «Faise xustiza por fin cun referente da cultura»

Con «felicidade absoluta» e «orgullo» celebra Lourenzá, en palabras da súa alcaldesa, Rocío López, a decisión da Real Academia Galega (RAG) de dedicar o Día das Letras Galegas de 2023 a Francisco Fernández del Riego, Fillo Predilecto do municipio. «Por fin se recoñece toda a labor que fixo a prol da cultura e da lingua galegas. Foi un dos grandes impulsores desta festa da nosa cultura e había que facer xustiza con el», explica a rexedora.

O sentimento de ledicia é extensible á Mariña, considera. «Levamos loitando moito tempo por este recoñecemento, as distintas corporacións de Lourenzá e o tecido asociativo. Elaborouse unha moción cunha petición á RAG que foi aprobada nos Concellos mariñaos e tamén na Deputación», salienta López, que agradece o respaldo tamén do Concello de Vigo ou a Fundación Penzol. Tamén se lembra de «dous veciños, Manuel Román e José López», pola súa labor divulgativa, e da asociación Patrimonio Laurentino.

Ao longo do 2023, o nome de Lourenzá estará en boca de todos durante un ano de actividades e actos para reivindicar a figura e a obra de Fernández del Riego. «Poñémonos á disposición da Xunta e da RAG e agardamos estar á altura do que el se merece», sinala López.

Desde Patrimonio Laurentino, que desde o 2020 pediu o recoñecemento para o escritor, intelectual e político, a presidenta, Remedios Gallo, define ao homenaxeado como como «un gran galeguista e un gran representante da cultura galega. Isto fará que traballemos aínda con máis ansia na nosa programación cultural para un ano perfecto», engade.

A vicepresidenta da Deputación e titular de Cultura, Maite Ferreiro, acolleu como unha «gran nova» o nomeamento e salientou que o laurentino «foi un loitador cultural incansable e unha institución do país, respectado por todos e aberto ás diversas manifestacións do galeguismo».

---

---

---