«Non se ascendeu, pero podemos ter a cabeza moi alta»

O adestrador do Durán Maquinaria Lourenzá lamenta as baixas de Marly Varela e Marta García na fase que vén de disputarse en Guipúzcoa


O Durán Maquinaria Lourenzá volveu a quedarse ás portas da Liga Feminina-2. Segundo o seu adestrador, o focense Juan Nécega, no novo intento non lle traizoaron os nervios nin a presión ou o cansazo. O maior obstáculo que atoparon na fase disputada en Azpeitia (Guipúzcoa) foron as baixas de Marly Varela, que se mancou no arranque do primeiro partido, e de Marta García, quen non puido viaxar por razóns persoais. «Coa plantilla ao completo seguro que teriamos moitas máis opcións», di o estratega mariñano.

-Decepcionado, frustrado, orgulloso... ¿Como se sente?

-Intento ordear a mestura de sensacións que me deixou a tempada. Síntome satisfeito e tamén orgulloso do papel que fixemos na liga regular, na que fomos campionas, pero á vez frustrado pola imposibilidade de render ao noso mellor nivel na fase de ascenso.

-¿E que pesa máis? ¿A ledicia ou a frustración?

-Non se ascendeu, pero podemos ter a cabeza moi alta. Esta é a lectura que debemos facer destes meses de competición.

-Desta vez tiñan mellores armas para a loita polo ascenso.

-É certo. Esta plantilla era máis competitiva e tiña máis calidade que a do ano pasado, estaba moi preparada e chegaba coa ilusión polas nubes. Foi unha mágoa a lesión de Marly e a baixa de Marta García, dúas xogadoras que viñan aportando moitísimo.

-¿Notaron a inactividade? Chegaron á fase despois de case un mes sen competir...

-Non creo que iso fose un problema. Nese tempo puidemos adestrar con todo o equipo e tamén xogamos un amistoso.

-¿Que nota merece Juan Nécega polo traballo feito esta tempada?

-Ao mellor puiden colaborar moito máis nesta fase... non sei, ou ao mellor non. Tratei de dar sempre o máximo e seguro que nalgunhas decisións acertei e noutras me equivoquei.

-¿E a nota para o equipo?

-Unha cualificación moi alta porque se esforzou moito durante todo o ano. Tivo ambición, compromiso, gañas..., e medrou unha barbaridade. Ademais, os resultados na liga regular foron moi bos.

-¿A que xogadora do Lourenzá elixiría como candidata para o MVP de Primeira Nacional?

-A Tamara Montero, pola súa calidade, ou a Rocío Varela, pola súa regularidade.

-¿Con que outras xogadoras competirían polo trofeo?

-Nesta categoría hai moitas xogadoras moi boas.

-¿Volverán intentalo?

-Esperemos que si.

-¿E con Nécega ao timón?

-Teño gañas de seguir, e máis despois deste novo intento por subir no que volvemos a quedarnos ca mel nos beizos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

«Non se ascendeu, pero podemos ter a cabeza moi alta»