Paco Rivas será o pregoeiro mañá en Foz das festas de San Lourenzo

M. Sande FOZ / LA VOZ

FOZ

XAIME RAMALLAL

O concello focense programa un agosto cheo de citas culturais e de ocio

05 ago 2021 . Actualizado a las 05:00 h.

O mestre e escritor de Nois Paco Rivas será o pregoeiro do San Lourenzo 2021 mañá en Foz. Será un San Lourenzo atípico pero que virá con múltiples concertos de formato reducido e actividades para os máis pequenos. O día 6 será o día da cultura local, xa que o Cenima a partir das 20 horas acollerá a inauguración da exposición doutro focego que coa súa escultura leva a Foz por todo o mundo, Otero Regal, que coa mostra «Hai mulleres» mostrará unha pequena parte do seu traballo.

Así mesmo Paco Rivas presentará o seu poemario Auxías. Ás 21 horas a atención desprazarase á Praza Rosalía de Castro, que será o escenario do pregón do poeta e que unha vez finalice amenizarase a noite co concerto da banda local Son’s Varadero, dentro do programa Sons na Rúa.

Inés López, concelleira de Cultura de Foz, destaca tamén que «os pequenos eventos continuarán con concertos na praza Conde de Fontao e na Praia da Rapadoira ás 13 horas, así como na Praza Conde de Fontao ás 22 horas dende o sábado ata o martes. O sábado 7 ás 20 horas na praza Conde de Fontao Títeres Alakrán chegará co seu espectáculo Circo Galaico, que fará as delicias dos máis pequenos, así coma o domingo 8, no que será o Mago Antón o que aparque o seu camión na coñecida praza, durante todo o día, enchendo de maxia Foz. O martes 10 de agosto, festivo en Foz, será o día das bandas. Ás 13 horas A Rebolaxe estará en Conde de Fontao e, como colofón á cultura local no San Lourenzo, ás 20 horas no Polideportivo do Campo da Cabana terá lugar o tradicional concerto da Banda de Música de Foz».

Inés López explica que tamén haberá cine na rúa: «O Cine na Rúa seguirá dando a volta ao concello con sesións ás 22.30 horas, para chegar á Praza do Concello o xoves 5 con Las Niñas, a Cangas o venres 6 de agosto con Dr. Dolittle, o 10 de agosto en San Martiño con Mujercitas, o xoves 12 na Praia da Rapadoira con Jojo Rabbit, o venres 13 en San Acisclo con Padre no hay más que uno, en formato autocine no aparcamento de Valle Inclán o xoves 19 con Bohemian Rhapsody e o día 20 en Cordido con Playmobil la película».

O teatro continuará todos os martes no pavillón do colexio Número 1. Tamén haberá Sons na Rúa con grupos locais os venres en varias prazas municipais ás 21 horas. O Sons na Rúa terá tamén grupos de fóra de Foz, que poboarán os fins de semana do 14 e 15 de agosto e o 21 e 22 de agosto.

A Feira do Libro volverá a Foz a partir do xoves 19 de agosto. E non hai que esquecer o Festival de Música Clásica Bal y Gay, que dende o 18 de agosto e ata o 26 do mesmo mes achegará a música clásica á Mariña. En Foz poderanse desfrutar varios concertos, os primeiros os días 18 no pazo de Fontao co cuarteto Seikilos e o 19 na igrexa de Foz con Cantoría. O día 22 na Finca Goleta con Puro Gershwin e día 26 na Basílica de San Martiño co Cuarteto Casals (entradas esgotadas en todos os concertos).

Será un mes de agosto moi cultural repleto de actividades. Iso si, «“todas as actividades serán con cadeiras, máscara e distancia de seguridade. Así mesmo haberá que anotar nome e teléfono para acceder aos recintos».