A entrega dos galardóns celebrarase cando o permitan as condicións sanitarias
06 may 2020 . Actualizado a las 05:00 h.O certame Lingua de Namorar para as mellores declaracións de amor en galego, promovido pola Xunta para dinamizar o uso da lingua entre a mocidade, xa ten gañadores. Na primeira categoría, para participantes de 14 a 19 anos, o primeiro premio foi para Nee Barros, de Marín, con Retórica, mentres que o segundo foi a parar a Primavera, presentado por Ana Loureiro, de Caldas de Reis. Houbo tamén un terceiro galardón, que recaeu en Ao altar, de María Femenías, de Foz.
Na segunda modalidade, para concursantes de 20 a 35 anos, os distinguidos foron, en primeiro lugar, Ataraxia, de Leticia Cid, de San Cibrao das Viñas; en segundo, Un vinilo dos Dire Straits, de Denís Vicente, da Guarda; e o terceiro, para Fuxitivas, de Silvia Pérez, tamén da Guarda.
O xurado tivo que reunirse por videoconferencia e estivo formado por Rosalía Morlán, en calidade de presidenta, mais Hugo Lozano, Nerea Pallares, Alicia Padín, Nancy Domínguez e Beatriz Corral.
A entrega dos galardóns, como xa vén sendo habitual dende que comezou a crise dos coronavirus, terá que celebrarse cando as condicións sanitarias o permitan. As mensaxes gañadoras e as outras 213 que concorreron ao certame poden lerse en www.xuventude.xunta.gal. En total, votaron 566 internautas.