Alcoa, a nosa empresa do aluminio: a unión fai a forza


Estamos ante un dos momentos máis importantes para a nosa comarca da Mariña.

Se hai 40 anos se produciu a chegada dun incrible motor de creación de emprego e de riqueza para a zona, os acontecementos que vivimos actualmente fannos avistar o posible fin de toda esta etapa de enriquecemento. Pero non debemos perder a esperanza, e temos que facer todo o necesario para visibilizar a nosa unión e única voz en prol do noso benestar.

Fai crecer a outros sectores

A nosa empresa do aluminio non só xera eses 1.100 postos de traballo directos e 700 indirectos. Traballos que ademais teñen polo xeral unha moi boa base de cotización, comparándoos con outros empregos da comarca. A nosa empresa do aluminio fai crecer a outros moitos sectores empresariais, comerciais e de restauración, xa que todos estes soldos que se xeran reverten, nunha alta porcentaxe, na nosa comarca, para que deste xeito outras moitas familias poidan atopar unha oportunidade laboral noutros sectores e así despois poder vivir e asentarse na Mariña.

Pero tampouco podemos nin debemos esquecernos doutros ámbitos, que ás veces nos poden pasar desapercibidos. Falo das Administracións públicas, e non só dos servizos veciñais, municipais, que se poden levar adiante cos ingresos que proceden do feito de ter esta empresa na zona, impostos como o IBI e IAE para Cervo e Xove e o IBI para outros concellos onde moitas destas familias residen.

Podemos vivir un pesadelo

Falo tamén da educación e da sanidade. Pensar en que a nosa empresa non estea é pensar en que moitos dos centros educativos non serían necesarios, nin así tampouco moitos dos servizos sanitarios e hospitalarios dos que hoxe podemos beneficiarnos. Pensar en que esta circunstancia pode pasar vólvesenos como un pesadelo, un pesadelo que desaparece se todos espertamos

É necesario que o Goberno central garanta un prezo competitivo da enerxía, ao igual que noutros países da Unión Europea.

Falamos da mesma reclamación que todos xuntos fixemos aló polo ano 2012. E para que nos escoiten en Madrid temos que berrar todos xuntos. Pero non imos, nin debemos, berrar contra ninguén. Ese creo que non é o camiño. Temos que berrar para que nos escoiten. Para que os responsables políticos vexan na nosa petición unha demanda xusta e necesaria para toda unha comarca coma a nosa. E nese movemento, nese berro, temos que estar todos. Todos os veciños e de todos os sectores sociais e laborais.

Unha demanda na que non pode haber cores políticas e na que eu mesmo así o pido e o demando. Son veciño e representante dos veciños de Cervo e por eles, polos veciños de Cervo e polos veciños dende o Vicedo ata Ribadeo, estarei e unireime para axudar a que a nosa comarca non dea un paso atrás.

A. Villares, alcalde de Cervo

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Alcoa, a nosa empresa do aluminio: a unión fai a forza