Alfredo Llano: «Nas Xornadas de Expomar o consumidor ten unha ocasión única para informarse sobre o peixe»

Alfredo Llano, alcalde de Burela e presidente da Fundación Expomar, valora a consolidación de dúas citas que converten estes días o municipio no gran foco do sector pesqueiro a nivel estatal, as Xornadas Técnicas e o Encontro Empresarial.

—As Xornadas Técnicas cumpren 29 anos e o Encontro Empresarial do sector 23. Non é pouco.

—O que pretende a Fundación Expomar é estar sempre a carón do sector náutico-pesqueiro. Que se vaian cumprindo anos demostran que a aposta é forte e foino desde o principio.

—As xornadas consolidáronse como un punto de encontro para abordar a actualidade do sector.

—Buscamos tratar as problemáticas que afectan ao sector. Xa sabemos que a pesca actualmente está a vivir momentos difíciles, con moitos factores que inflúen nesta actividade. O xoves o programa estará centrado neste punto, en abordar preocupacións e posibles solucións.

—O programa de mañá pretende achegar a pesca ao consumidor.

—Eu animo á xente a que acuda os dous días ao evento, pero si é certo que mañá será unha oportunidade única e aberta para que os consumidores, calquera persoa que teña curiosidade, poidan informarse sobre o peixe e como se captura, sobre por que ten o prezo que ten, sobre a súa calidade, sobre como e onde se pode mercar ou sobre os beneficios que ten o seu consumo.

—O consumidor cada vez é máis esixente.

—Cada vez o consumidor e o sector están máis concienciados coa sostibilidade da pesca, e aquí temos exemplos extraordinarios coas capturas do bonito ou da pescada do pincho. Recentemente fixemos un encontro sobre o peixe e a súa capacidade para previr problemas de saúde mental que foi todo un éxito. A xente quere informarse para decidir que tipo de comida quere.

—Este ano recupérase a presencialidade dos dous eventos.

—Recuperar as reunións presenciais era necesario. No 2020 as xornadas foron telemáticas e no 2021 semipresenciais, e penso que foron fórmulas válidas en dous momentos distintos da pandemia, pero para abordar as preocupacións do sector e achegar a pesca ao público o mellor é vernos e conversar cara a cara.

«Queremos que a feira de 2023 sexa histórica e para iso buscamos ampliar a superficie»

A Fundación Expomar ten entre cella e cella a celebración da Feira Náutico-Pesqueira, aprazada a 2023. A última edición, celebrada no 2019, foi a máis concorrida da historia, con 135 stands, e a organización quere mesmo subir un chanzo máis o listón.

—Que pode adiantar da feira de 2023?

—A edición de 2019 foi extraordinaria, saíu todo o mundo moi contento e anticipando xa que viría para a convocatoria seguinte. Estamos cavilando agora mesmo sobre o necesario preparar unha feira histórica. Tiñamos previsto xa na edición frustrada pola pandemia ampliar o espazo expositivo e seguimos con esa intención, pensamos en acoller en Burela a todo aquel que teña algo interesante que expoñer, tamén co obxectivo de diversificar a oferta o que poidamos. Teremos, coma sempre, a vangarda do sector nun encontro que é unha referencia nacional e que vai ser moi esperado.

---

---

---