Alba Geada, terceira na final galega da Olimpíada de Filosofía: «É necesario reflexionar sobre a nosa mortalidade, porque é unha parte esencial humana»

y. garcia BURELA/LA VOZ

BURELA

CEDIDA

«A filosofía e a psicoloxía sempre me interesaron moitísimo», sinala esta alumna burelense de Bacharelato de Artes no IES Monte Castelo

22 abr 2022 . Actualizado a las 12:37 h.

«É complicado cando é algo que levas tempo preparando, pero quédome coa resposta positiva que tiveron participantes e profesores, dicindo que lles gustara moito. A xente estaba contenta escoitándome e iso apreciáse moito», sinala Alba Geada (Burela, 2004), estudante do IES Monte Castelo de Burela, ao fío de acadar o terceiro posto na recente final autonómica da Olimpíada da Filosofía 2022, en Santiago. De 56 institutos galegos presentados, seleccionaron catro.

—Que disertación presentou?

—A miña foi sobre se nos humaniza ou deshumaniza a tecnoloxía. Tiñamos dez minutos para defender con argumentos e contraargumentos a nosa redacción.

—Cal foi e é a súa reflexión?

—Partindo da base de que a meta do transhumanismo é a inmortalidade, alongar a esperanza de vida o máximo posible, creo que non se debería perder de todo a capacidade de reflexionar sobre a nosa mortalidade. Porque ser mortais é unha parte esencial da especie humana.

—A morte segue a ser tema tabú.

—De sempre, os meus profesores me dixeron que eu era moi existencialista. A morte en si, non a dor, é un final. Paréceme un tema complexo e interesante, igual que o misterio do que hai despois da morte no que entra a relixión. É unha realidade que nos vai pasar, non hai escapatoria de momento. Por iso me parece necesario falar sobre iso.

—Cara onde dirixe os estudos?

—Estou facendo segundo de Bacharelato de Artes e teño pensado irme estudar Bellas Artes, a Valencia. Gustaríame facer algo de Erasmus ou un postgrao fóra.

—Quere vivir da arte...

—A arte e as novas tecnoloxías son algo que está en pulo. Por exemplo, o deseño de páxinas web é unha disciplina das artes.

—Tendo esa vea artística, como acabou na Olimpíada de Filosofía?

—Sempre pensei que me gustaría ser como eran antes os homes do Renacemento, que facían un pouco de todo. Non me gustaría limitarme, por exemplo, a ser pintora e xa está. De feito, a filosofía e a psicoloxía sempre me interesaron moitísimo. Tiñamos como optativa Ética e Filosofía do Dereito porque para Historia da Filosofía e Psicoloxía tiña que deixar Artes. Así que pillei esa, Ética. Son clases que me gustan moito porque son dinámicas, relacionadas coa cultura xeral (cine, literatura...) e complementan as asignaturas de Artes. Precisamente por iso tamén incluín na miña disertación bastantes referencias ao cinema, mencionei Blade Ranner, Odisea en el espacio ou a libros como Un mundo feliz de Aldous Huxley.