«Ningún rival nos pasou por enriba, pero temos que aprender»


burela / la voz

Non está sendo nada fácil a adaptación do Pescados Rubén-Burela á mellor liga do mundo. O equipo mariñán só sumou un punto nas cinco primeiras xornadas e é o pechacancelas da Primeira División. «Queda moita liga. O ano pasado empatamos os dous primeiros partidos e despois ascendimos», lembra Juanma Marrube. O adestrador alfocense non perde a calma nin a confianza nos seus.

-¿Está preocupado?

-Non. Non estou preocupado. É unha liga moi longa e moi igualada, na que se está vendo que todos os equipos quitan puntos a todos. Estaría preocupado se vise que os rivais nos pasan por encima, pero non é unha cuestión de xogo. Trátase de que temos que adquirir fortaleza mental ante as adversidades. Para un equipo recén ascendido, adaptarse a Primeira sempre é complicado e nós somos o terceiro ou cuarto presuposto máis baixo. Queda moita liga. O ano pasado empatamos os dous primeiros partidos e despois ascendimos.

-Agora van xogar ás canchas de ElPozo e en apenas tres semanas á do Barça. Se non sacan puntos na casa ante Peñíscola e Zaragoza, a visita a O Parrulo, que xa ten sete puntos, pode convertirse en case unha final.

-Non comparto esa visión tan a vida ou morte. Se nós pensamos iso, que deben pensar no Aspil Vidal, que é un equipo afeito a loitar por estar entre os oito mellores e só leva dous puntos? A realidade da liga é esta, hai moitísima igualdade, e por iso custa tanto conseguir puntos.

-Seis goles en cinco partidos son moi poucos, non cre?

-Palma tamén leva seis, Industrias oito. E sumaron bastantes máis puntos. Córdoba gañou un partido 0-1, nós cun só gol case gañamos a Levante. Trátase de saber vivir na adversidade. A falta de gol é un problema da liga, non do Burela. Non debemos buscar fantasmas.

-E como se pode corrixir?

-Nós non podemos fichar xogadores con moitísima pegada porque non temos eses cartos. Temos que chegar ao gol como equipo, desde o grupo, con traballo en conxunto.

-Coa lesión de Iago Míguez, este plantel necesita fichaxes?

-Somos un plantel amplo, e menos mal porque con Pitero aínda non puidemos contar, Jacobo xogou un partido, Iago Míguez tres... Creo que temos xogadores con moito talento, pero que non xogaran en Primeira e teñen que adaptarse. Outros xa estiveran en Primeira, pero tiñan outro rol e agora deben tirar do carro. Tamén se teñen que adapatar.

-Como están os ánimos dos futbolistas?

-O equipo está ben, pero necesita dar un paso adiante, encontrar a fortaleza mental ante as dificultades. Ningún rival nos pasou por encima, pero temos que aprender a afrontar as adversidades de Primeira. Se os partidos durasen 30 minutos teríamos moitos máis puntos, e iso demostra que estamos competindo, que hai moitas cousas boas, pero cústanos responder cando recibimos un golpe.

-Afirmo: o plantel do Burela non é o peor de Primeira.

-Creo que temos un bo plantel, cunha boa estrutura de xogo porque o bloque xa leva uns aniños xunto. Temos un potencial grande. Do noveno ao 16 da liga podemos competir en igualdade de condicións contra todos. Pero a tódolos equipos cando suben de Segunda lles custa, a adaptación leva un tempo. O ano pasado o Valdepeñas na xornada oito levaba un punto; salvouse e este ano leva oito en só cinco.

-Pensa que o seu posto periga?

-Nin por un segundo. Vexo aos xogadores dispostos e concienciados para sacar adiante isto. Tamén hai que entender cal é a realidade do club, que en 30 anos de fútbol sala en Burela estivemos seis en Primeira, e cando subíu o Cefire volveu baixar no primeiro curso. Ter un club así na Mariña é un luxo, pero non hai que esquecer onde está a nosa realidade.

-Vostede estaba no plantel do primeiro Pescados Rubén que xogou en Primeira. Aquel equipo tardou 15 xornadas en gañar. Ve similitudes?

-Penso que aquel equipo era inferior en canto a potencial. Agora subimos dunha forma sólida, pero entón ascenderase tras ser sétimos e nun curso con cambio de adestrador incluido. A categoría colleunos moi verdes. Sen embargo, desde a chegada de Matamoros e Isi enderezouse o rumbo e aguantamos cinco anos en Primeira. Tamén creo que o nivel daquela liga non era o de hoxe, pero os comezos sempre son duros.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«Ningún rival nos pasou por enriba, pero temos que aprender»