Educación acometerá a reforma integral do Ceip Virxe do Carme de Burela por 956.043 euros
BURELA
O colexio, dos anos 70, precisa dunha rehabilitación, e executarase en tres meses
27 mar 2019 . Actualizado a las 05:00 h.A Consellería de Educación vén de licitar a rehabilitación integral -enerxética e funcional- do CEIP Virxe do Carme de Burela por un importe de 956.043 euros e un prazo de execución de tres meses, tal como se publica a plataforma de Contratos de Galicia.
O delegado territorial da Xunta en Lugo, José Manuel Balseiro, explicou en rolda de prensa as características desta obra que implica a renovación e modernización global das instalacións dos tres edificios que compoñen o complexo (edificio docente principal, edificio de ladrillo cara vista e edificio de aulario), que foron construídos nos anos 70. As instalacións están moi deterioradas.
En concreto, no edificio docente principal -que consta de dúas plantas e unha superficie construída de case 1.600 metros cadrados- substituirase a cuberta de fibrocemento en terraza e os falsos teitos en aulas, renovaranse os aseos de infantil e dos profesores, a tarima e os armarios das aulas e as portas de acceso á parcela do centro, e pintaranse os paramentos interiores do dito edificio. Ademais, mellorarase a eficiencia enerxética do edificio con illamento térmico na cara inferior do teito, illamento do forxado de baixocuberta con lá de roca, illamento de fachada polo exterior mediante sistema SATE, e substitución de luminarias existentes por equipos de alta eficiencia enerxética.
No caso do edificio de ladrillo cara vista e do edificio do aulario, a intervención abrangue o illamento das fachadas, o illamento térmico do forxado das baixo cubertas, e substituirase as ventás por carpintería de aluminio con rotura de ponte térmica e dobre vidro, e as luminarias por equipos de alta eficiencia enerxética., tal como explicaron.