Darío Campos: «A Queima dos Fornos é dos mellores espectáculos pirotécnicos de Galicia»

O rexedor local pontenovés resalta o avance en proxectos «estrela» como a residencia e a Senda Verde, única galega


A PONTENOVA / LA VOZ

Darío Campos, alcalde do Concello de A Pontenova, saca un anaco da súa xornada habitual para falar do municipio, proxectos de futuro, pasado e presente pero tamén das festas, que son unha moi boa escusa desta conversa. De feito, sinala sobre os festexos: «As festas son a ledicia do pobo, cando a xente invita á familia a comer e pasalo ben. É como o cume do ano. Recordo cando era pequeno estaba esperando a que chegaran as festas do pobo polos doces a pola reunión coa familia. Convidamos a todos a que veñan ás festas da Pontenova, sobre todo á Queima dos Fornos que é dos mellores espectáculos pirotécnicos de Galicia agora mesmo. Convidamos a todos os lucenses pero tamén aos asturianos a vir».

-Canto tempo leva ocupando o sillón da alcaldía pontenovesa?

-Doce anos e pico.

-Que balance faría, xa non só a nivel político senón tamén persoal, se o cargo desgasta?

-A nivel persoal é unha boa experiencia e recomendable para todos os veciños, que vexan o que hai e o que tes que facer ás veces para chegar a moitos sitios. Creo que con dedicación e traballo van saíndo as cousas para adiante.

-Compaxinouno ben cando presidía a Deputación de Lugo?

-Compaxineino ben. Foi diferente. A verdade é que foi duro pero máis ben pola Deputación que polo Concello.

-Nun concello da dimensión do de A Pontenova, cales son as ocupacións día a día?

-Sacar adiante proxectos. Con algúns deles levamos doce anos como é a recuperación da mina, a residencia tamén coa idea de darlle para diante dende que entramos pero, por unha cousa ou por outra, foi difícil. Agora parece que iso o temos encamiñado. Con respecto á residencia, compramos a última finca, estamos a rematar o proxecto de execución e esperamos que este mes nolo entreguen... e xa se podería contratar.

-Estamos logo nunha fase determinante da residencia.

-Pasamos moitos anos sen ver nada. Ata a Confederación nos contestou relativamente rápido porque está a menos de cen metros do río. Agora creo que xa neste ano se podería contratar a licitación da residencia.

-Foi unha longa espera.

-Como xa dixen, levamos uns doce anos. Desde que entrei como alcalde foi unha das cousas que me faría ilusión poñer en marcha. É necesario. Moita xente de aquí está vivindo soa e de cada dous por tres nos pregunta cando se abre a residencia porque agora mesmo a poboación é cada vez máis maior xa e é un problema gordo que haxa xente que viva soa e que o pase mal a nivel de calidade de vida.

-Outro dos proxectos estrela de A Pontenova é o da mina.

-Creo que agora estamos facendo un bo traballo, coa recuperación do Forno do Boulloso. Hai un investimento de case 140.000 euros da compra da finca, do forno e a restauración. Polo menos está visible porque estaba nunhas condicións nas que ía caer; ata había un pino no alto do forno que estaba facendo unhas gretas importantes. Así poñemos en valor o pasado mineiro de A Pontenova. Outro proxecto que temos e no que andamos, na compra das fincas, é a posta en marcha da tirolina. É un proxecto, para min, tamén estrela. É a recuperación do noso pasado, nese sentido estamos traballando para poñelo en valor.

-Viría sendo como unha revalorización do pasado para que tamén dea os seus froitos no futuro, sobre todo a nivel turístico.

-Este é un concello que vive da madeira e agricultura e gandería hai pouca e do que nos queda é as empresas do polígono de Recende, algo de turismo rural hai e están funcionando moi en. Pero sería tamén interesante sacar o proxecto da Senda Verde para diante, na nosa zona pero tamén en Ribadeo, Trabada e San Tirso, así como ter as infraestruturas e carreteiras en condicións dignas para a xente do rural.

-A Senda Verde, ademais, é a única que hai en Galicia.

-Si. Este verán veu moita xente facéndoa en bicicleta, andando... todas as fins de semana. É un entorno moi dinamizable turisticamente.

«Coa tirolina quixemos recordar por onde baixaban as vagonetas»

A Pontenova é un dos núcleos do interior mariñao con moito potencial. «O interior mariñao -resalta o rexedor local pontenovés Darío Campos- ten moita natureza e moito onde traballar. Queda moito por facer pero tamén se fixo bastante. Por exemplo co tema da tirolina, quixemos recordar un pouco por onde baixaban as vagonetas co mineral, a través dun cable e foi onde sacamos a idea. Tamén poder entrar nas galerías a modo de espeleoloxía pois teñen uns colores impresionantes».

-Ese «illamento» derivado das infraestruturas en certas zonas, podería ser aproveitado como «vantaxe» para buscar un turismo de natureza e tranquilo ou o denominado «slow»?

-Creo que a xente que vén aquí vén a buscar o descanso e a natureza e nese aspecto aquí temos suficiente.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Darío Campos: «A Queima dos Fornos é dos mellores espectáculos pirotécnicos de Galicia»