Este luns comezou a selección de participantes para o obradoiro de emprego do Vicedo, Ourol e Muras

Este luns comezaron no Vicedo as probas de selección para o obradoiro dual de emprego que nos próximos meses acollerán de maneira conxunta os concellos do Vicedo, Ourol e Muras, baixo a denominación Terras do Sor VIII, e que será subvencionado pola Consellería de Emprego, Comercio e Emigración da Xunta de Galicia. Haberá dúas especialidades: unha de traballos de carpintería e moble, con aplicación de vernices e lacas en elementos de carpintería e moble; e outra de actividades auxiliares de conservación e mellora de montes. Cada unha oferta dez prazas. Tanto o alcalde do Vicedo, Jesús Novo, como o de Ourol, José Luis Pajón, confían en que os participantes podan ter maiores opcións de acceso ó mercado laboral. Poden participar na iniciativa persoas desempregadas da contorna, que contarán cun contrato de traballo durante os nove meses de duración do obradoiro. Para poder optar a unha das vacantes é imprescindible estar inscrito como demandante de emprego na Oficina de Emprego de Viveiro e non ter ocupación no momento da selección, ademais de cumprir cos requisitos específicos que recollen as bases da convocatoria. 

---

---

---