«Hoxe venres ofreceremos gratis unha tortilla de catro metros e mañá churrasco»
A MARIÑA
La Conservera en Celeiro festexa estes días o seu primeiro aniversario con entrada gratis para ver a Gin Tonic's e Los Alcántara
10 abr 2026 . Actualizado a las 07:49 h.Cúmprese un ano desde que o hostaleiro viveirense José Manuel Vázquez, Leman, fixo realidade o soño de reunir nun mesmo espazo boa música e boa gastronomía cunha programación continua. La Conservera, emplazada nunha antiga conserveira de Celeiro, festexa esta semana (entre onte, xoves, e mañá, sábado) o seu primeiro aniversario cun programa moi completo no que a entrada será gratuíta e haberá máis dunha sorpresa.
—Que balance fai deste tempo?
—É certo que organizar concertos custa máis traballo que vender pizzas, pero todo na vida é unha aprendizaxe. De cara ó futuro gustaríanos ampliar aforo para meter bandas máis potentes, e se aparecese un socio estaríamos abertos a facer máis investimentos.
—Que grupos ou concertos destacaría dos que pasaron neste tempo polo local?
—Persoalmente, do pouco que puiden ver, o que máis me gustou foi Santi Campillo, que para min é un dos mellores guitarristas que hai en España e veu xa dúas veces. A nivel de público, un dos grupos que mellor funcionou foi Nueva Línea. La Conservera estivo chea ese día. Ademais, as bandas tributo funcionan ben sempre.
—Que deseñaron para esta fin de semana de aniversario?
—Para o xoves, bingo musical con Marisa Prisa. E o venres [hoxe] ofreceremos gratis unha tortilla xigante, de polo menos catro metros. Logo actuarán Gin Tonic’s, que sempre funcionan ben, e DJ Senin. E o sábado haberá concerto de Los Alcántara, outro dos grupos que sempre son garantía, e tamén DJ Senín. E haberá churrasco gratis.
—Podería avanzar algo da programación das próximas semanas?
—Entre abril e maio imos ter bastante de música urbana, con artistas como Lg1do, moi escoitado en Spotify e a quen pechamos antes de que saltara á fama. Continuaremos con bandas tributo de homenaxe a ACDC, que me vai facer moita ilusión, ademais de outras de homenaxe a Ilegales e a Extremoduro. E seguiremos apostando pola música en galego con Sabela ou Boyanka Kostova, do cantante de Ortiga. Será sobre todo polo Día das Letras Galegas.