Seiscentos alumnos de 18 centros participarán nos Xogos Olímpicos da Mariña o mércores 17

Con motivo do Día da Educación Física na Rúa, seiscentos alumnos de 18 centros de educación primaria e secundaria de toda A Mariña participarán o próximo mércores, 17 de abril, nos Xogos Olímpicos que promove o Seminario de profesores de Educación Física (Sef) da comarca. Nesta ocasión, a cita terá lugar en Ribadeo e desenvolverase entre as 10.00 e as 14.00 horas na Avenida de Luarca e na Rúa Alfredo Deaño, ademais de nos dous pavillóns municipais, os patios e instalacións do IES Dionisio Gamallo e do CEIP Gregorio Sanz, e o campo municipal de fútbol Pepe Barrera.

Segundo expoñen desde a organización, os participantes irán rotando por distintas zonas. Deste xeito, haberá estacións de hockey, atletismo (modalidades de vallas, relevos, lanzamentos e velocidade), balonmán, baloncesto, skate, judo, bádminton, voleibol, rugbi, remo, tenis de mesa, golf e tenis. Este ano, o Sef conta coa axuda de distintos clubs e asociacións deportivas, como o Club de Hóckey Isla Pancha, o Club Atletismo Ribadeo, o Club Balonmán Ribadeo, o Club Baloncesto Ría de Ribadeo, a Escola de Ximnasia Porta Norte, o Club de Bádminton Vegadeo, o Club de Voleibol San Ciprián, o Club de Rugby Asterix A Chabola de Viveiro, o Club de Atletismo San Ciprián, o Club de Remo de Ribadeo, o Club de Tenis de Mesa de Ribadeo, o Castropol Golf e Holaola Surf Escola.

A actividade conta co financiamento do proxecto Xogade, da Xunta de Galicia, que subvenciona os desprazamentos do alumnado. O Concello ribadense colabora coa cesión dos espazos e axudando coas tarefas organizativas a través dos servizos de Policía Local e Protección Civil. Ese día estarán cortadas ó tráfico a Avenida de Luarca e a rúa Alfredo Deaño. Ademais, o Colef (Colexio Oficial de Licenciados en Educación Física) terá instalada unha carpa para cada unha das estacións. Os promotores invitan a toda a comunidade a achegarse.

---

---

---