Viveiro adxudica por 680.000 euros a obra para reformar a rúa do Porto de Celeiro
A MARIÑA
A actuación humanizará unha das zonas máis transitadas do porto viveirense
03 mar 2024 . Actualizado a las 05:00 h.O Concello de Viveiro adxudicou as obras para a humanización da rúa do Porto do Celeiro, unha transformación integral que comezará nas próximas datas e inclúe a pavimentación e renovación de todos os servizos da rúa. A empresa adxudicataria é Xestión Ambiental de Contratas.
Segundo sinala a alcaldesa, María Loureiro, a Deputación de Lugo achegará unha partida de 544.563,82 euros, mentres que o concello achegará 136.140,96 euros. O orzamento total da citada actuación é de 680.704,78 euros.
Trátase dun proxecto que abrangue unha zona moi ampla no cruce formado pola rúa Lavandeiras, a LU-P-6612 e a rúa do Porto de Celeiro, acceso principal de vehículos e peóns á fachada marítima de Celeiro.
O proxecto contempla o movemento de terras e demolicións; pavimentación de beirarrúas e zonas de aparcadoiro; a reposición da rede de saneamento, pluviais, abastecemento e alumeado público; así como a canalización da electricidade, as telecomunicacións, a dotación de xardinería, mobiliario urbano e sinalización horizontal e vertical da zona.
«É unha obra imprescindible para mellorar a mobilidade e a accesibilidade dos veciños e veciñas de Celeiro. Mantendo o espírito e a esencia mariñeira tan característica da zona, levaremos a cabo unha renovación integral dunha das áreas máis dinámicas do concello, renovando os seus servizos e cumprindo as demandas veciñais», engadiu María Loureiro.