O Goberno anula a denominación Ría del Eo e avala o nome oficial de Ría de Ribadeo

O topónimo Ría de Ribadeo volve a ser o único oficial, de momento. Así o vén de decidir a Subsecrataría de Transportes, Mobilidade e Axenda Urbana, estimando parcialmente os recursos interpostos polo Concello de Ribadeo, a Xunta de Galicia, a Deputación de Lugo e varias asociacións contra a resolución da Dirección General do Instituto Geográfico Nacional que, a instancias do Principado de Asturias, aprobou fai uns meses a cooficialidade co topónimo Ría del Eo. Pero o debate non está pechado, porque o que vén de facer o Ministerio é anular a resolución recorrida (a da cooficialidade dos topónimos ría del Eo/ría de Ribadeo) e ordear retrotraer as actuacións ó momento previo á solicitude do informe por parte do Principado á Comisión Especializada de Nombres Geográficos (GENG), para que esta comisión emita un novo informe "que contenga una motivación suficiente", que xustifique a decisión que, finalmente, adopte.

Os recursos foron presentados polo Concello de Ribadeo, a Deputación de Lugo, a Xunta de Galicia, por Evaristo Lombardero Rico en nome da Plataforma pola Defensa da Ría de Ribadeo, e por Francisco José Campos Dorado, en nome e representación da Plataforma de Marinos de Ribadeo.

Nunha primeira valoración, o alcalde de Ribadeo, Fernando Suárez (BNG), aludiu a irregularidades na tramitación do procedemento a instancias do Principado de Asturias e lembrou que as rías levan o nome da poboación mais importante ao longo da historia. Dende o PP local, Daniel Vega, tamén expresou a súa ledicia porque o Goberno -dixo- rectificase a súa decisión e de novo Ría de Ribadeo sexa o único topónimo oficial.

Tamén a voceira socialista do goberno provincial da Deputación de Lugo, Pilar García Porto, informou que a Deputación recibiu este venres unha resolución da Subsecretaría de Transportes, Mobilidade e Axenda Urbana do Ministerio de Transportes que avala as alegacións presentadas pola institución provincial sobre o topónimo Ría de Ribadeo e anula o ditame do Instituto Xeográfico Nacional de establecer como cooficial a denominación de Ría del Eo.

García Porto explicou que a Deputación presentou en decembro un recurso de alzada contra a resolución que ditou o pasado mes de outubro a Dirección Xeral do Instituto Xeográfico Nacional que establecía manter a denominación de Ría de Ribadeo como identificador xeográfico e outorgar ao topónimo Ría del Eo o carácter de nome alternativo, é dicir, co mesmo nivel de oficialidade e uso que Ría de Ribadeo.

A Subsecretaría de Transportes do Goberno de España vén de resolver sobre este recurso, e anula dita resolución do Instituto Xeográfico Nacional.

---

---

---