O GALP achegará o medio mariño a 600 nenos de 3 a 5 anos de A Mariña e Ortegal

La Voz VIVEIRO / LA VOZ

A MARIÑA

Imaxe de arquivo de bonitos, un dos peixes con máis sona que capturan barcos de A Mariña, no Almacén do Peixe, en Burela
Imaxe de arquivo de bonitos, un dos peixes con máis sona que capturan barcos de A Mariña, no Almacén do Peixe, en Burela PEPA LOSADA

As xornadas divulgativas desenvolveranse en quince escolas entre o 27 de abril e o 1 de xuño

24 abr 2022 . Actualizado a las 17:59 h.

Ao redor de 600 escolares de educación infantil, con idades comprendidas entre os 3 e os 5 anos, das comarcas de A Mariña e Ortegal participarán ó longo das vindeiras semanas nas xornadas de divulgación científica e educación ambiental que organiza o GALP A Mariña-Ortegal. A actividade formará parte da programación anual de dinamización do grupo de acción local do sector pesqueiro, e a través dela pretende fomentar o coñecemento sobre o sector do mar entre os nenos, ó tempo que potencia «a súa curiosidade innata» dun xeito ameno e divertido.

Quince escolas

Un total de 15 escolas sumaranse á iniciativa que se desenvolverá entre o 27 de abril e o 1 de xuño. O calendario será o seguinte: 27 de abril (O Vicedo e Mañón), 18 de maio (Viveiro), 19 de maio (Ortigueira), 23 de maio (Barreiros e Ribadeo), 25 de maio (Cariño e Cedeira), 26 de maio (Foz) e 1 de xuño (Cervo, Xove e Burela).

Entre as temáticas elixidas estarán: Quen vive no noso mar?, Imos á peixería, Basuras mariñas e Artes de Pesca. «A máis escollida foi ‘Quen vive no noso mar?, elixida por dez das escolas, seguida de ‘Basuras mariñas’, escollida por catro delas», apuntan desde o GALP. O equipo de divulgadores co que conta o grupo para este programa está formado por oceanógrafos con experiencia no desenvolvemento de actividades educativas e de divulgación científica en relación ó medio mariño e ó sector da pesca.