David Mariño, presidente do comité de Vestas: «Hai interés, pero non sabemos cal é o compromiso da empresa coa venda»

Ramón González Rey

A MARIÑA

David Mariño, á esquerda, nunha protesta do persoal de Vestas
David Mariño, á esquerda, nunha protesta do persoal de Vestas PEPA LOSADA

Os traballadores viven con nerviosismo esta conta atrás ata o 31-D

12 dic 2021 . Actualizado a las 05:00 h.

Despois dunha longa loita que comezou o pasado 21 de setembro, cando Vestas anunciou que pechaba a fábrica de Chavín, os traballadores da multinacional danesa en Viveiro afrontan semanas clave no conflito laboral. A compañía teima en pechar a fábrica o 31 de decembro malia o interese de fondos de investimento que esixen para mercar que a factoría siga en marcha. David Mariño, o presidente do comité, analiza a situación na conta atrás para unha solución.

—Que empresas están interesadas na planta de Viveiro?

—Non sabemos os nomes, porque Xunta e Vestas aludiron a que é polo de agora algo confidencial. A empresa fala de catro firmas que solicitaron información, unha das cales sería do sector inmobiliario de montaxes e as outras tres do noso, da enerxía eólica. Por parte do Goberno autonómico trouxéronse á mesa industrial tres fondos de investimento interesados na unidade produtiva. O que queren é mercar a fábrica con todo o persoal funcionando e cunha produción en marcha, así que de parar xa non habería interese. Queren asinar cun plan produtivo: continuar a producir os produtos de Vestas durante un tempo fixado.

—Cal foi a resposta de Vestas?

—Un non rotundo. Di que non se vai seguir producindo para axudar a estes fondos de investimento nin por ningún outro motivo. Mantén a data de peche, o 31 de decembro. Eles xustifican o ERE en que non se pode continuar coa produción aquí en España. De abrirse a facelo, deixarían en evidencia o propio despedimento colectivo.