O sector pesqueiro é un eixe, esencial, estratéxico e fundamental. O noso porto de Celeiro é un dos piares máis significativos e importantes na economía de Viveiro. Referente de Galicia e do Cantábrico por descargas, facturación e polos empregos directos e inducidos que xera, tamén é clave para A Mariña, Lugo e Galicia. Nestes tempos convulsos que nos toca vivir pola pandemia, reforzou o seu valor engadido xogando un papel indispensable como provedor de alimentos.

Séculos de historia acreditan á pesca de Celeiro. O seu presente e o futuro que ten por diante determinárono a Confraría de Pescadores Santiago Apóstolo e a empresa Puerto de Celeiro. Coordinándose, coa sociedade de armadores ao timón, puxeron os piares da nova lonxa e das novas instalacións. Consolidaron a competitividade de Celeiro cun conxunto de empresas que traballan para mellorar en todos os eidos. Xeran arredor unha morea de empregos directos e indirectos, pois por cada embarcado no mar asócianse entre catro e seis postos en terra.

Todo ese entramado de empresas e o esforzo de tripulantes, armadores, persoal da lonxa, distribuidores, transportistas e peixeiros asentan a Celeiro no mercado global da pesca. Desde Viveiro saen prestixiosos produtos do mar frescos cara o resto da provincia, de Galicia e de importantes mercados nacionais, como Mercamadrid.

De sobra coñecido, non está demais lembrar que o produto estrela na lonxa viveirense de Celeiro é a merluza do pincho. Un peixe fresco acreditado por distincións a nivel galego, nacional e internacional. Por exemplo, Galicia Calidade, Premio Alimentos de España ou a certificación Friend of the Sea. Mais son os consumidores e os restauradores os mellores embaixadores dun produto de referencia nos mercados e nas mesas.

Así e todo, acadar eses resultados ten aínda máis mérito polas problemáticas da pesca. Agora, descartes, cotas do 2021, o brexit... Segue pendente a falta de relevo xeracional, tanto de mandos como de mariñeiros... Pinceladas das inquedanzas dun sector estratéxico no que as Administracións deben defender os intereses colectivos.

En clave local, tal e como levamos no noso programa de goberno en resposta ás demandas do sector, Viveiro precisa xa dunha escola para impartir cursos básicos e avanzados, así como dun ciclo medio de formación profesional de ponte e máquinas. Evitarían longos desprazamentos aos profesionais e facilitarían incorporarse á pesca aos que queiran, o relevo xeneracional.

No Concello de Viveiro seguiremos colaborando e apoiando á pesca e a Puerto de Celeiro. Por exemplo, nas xornadas técnicas, que este ano non se poden celebrar polo covid-19 e cumprirían 25 anos sendo referente nacional e internacional. Ademais, cooperamos na promoción da merluza de Celeiro en feiras como Expoxantar Ourense, Semana Verde de Galicia en Silleda ou Fitur en Madrid, e tamén contribuimos á Festa da Merluza de Celeiro, de Interese Turístico Galego.

María Loureiro é a alcaldesa de Viveiro.

Por María Loureiro Alcaldesa de Viveiro

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Clave na economía de Viveiro