Ugia Pedreira dará un concerto no Instituto Cervantes de París

Representará «Rosalía, o ramalho», unha creacion escénica sobre a obra Follas Novas


RIBADEO / LA VOZ

A cantautora mariñana, de Vilaronte (Foz), e polifacética artista Ugia Pedreira, levará a súa voz e obra a un marco excepcional, o Instituto Cervantes de París, nun acto organizado polo propio ente e a embaixada de España en Francia. Ugia ofrecerá o concerto «Rosalía, o ramalho», que o propio Instituto Cervantes en París presenta así: «Es una creación escénica específica sobre el inicio del libro Follas Novas, de Rosalía de Castro. Pedreira se centra en la Rosalía más sagaz, rebelde, indignada, apasionada y transparente. Una visión construida desde el pensamiento poético de la autora y adornada por su calidad humana».

O concerto será o día 20 de marzo, e está previsto que dure unha hora. No programa figuran oito obras compostas por Ugia Pedreira, sobre os oito primeiros poemas de Vaguedás, de Follas Novas.

Para Ugia é un capítulo máis na súa prolífica carreira, dende que de moi nova se dese a coñecer cos seus primeiros tres discos con Chouteira e despois pola súa labor no Conservatorio de Música Tradicional e Folque (CMTF) de Lalín, cos grupos Marful, Nordestinas, o dúo que formou con Óscar Fernández, o álbum co cantante brasileiro Fred Martins... Ten colaborado e compartido escenario cos máis importantes artistas do panorama musical galego e actuado en varios países.

Fai uns anos asentouse en Rinlo e agora en Castropol, sen perder nunca a súa vinculación coa arte, que difunde, por exemplo, a través da Oficina Galega de Outros Asuntos e Movemento. Segue explorando novos campos artísticos e continúa promovendo agrupacións, como o Coro da Mariña, que codirixe.

Ecocidio no monte

Sobre o traballo que levará a París, Ugia Pedreira explica: «Foi un encargo que me fixeron en Pontevedra para o día de Rosalía. O que fixen foi un paralelismo entre Follas Novas e as follas novas que temos na actualidade, que son de eucalipto. A primeira parte de Vaguedás, de Rosalía, é moi emotiva, escrita dende un punto de vista moi persoal e íntimo, falando da desgraza, das miserias da condición humana. E a partir de aí funme ó ecocidio que estamos vivindo nesta zona no monte, onde estamos matando o solo e o futuro. Musiquei os poemas e levo uns ramallos de eucalipto, para cantar so cunha guitarra, que por certo merquei en París fai un ano. É fundamentalmente, un concerto de arte escénica, de voz, corpo e mínima instrumentalización».

«Levo moitos anos cunha relación estreita con Francia. Parecía como se caera de caixón que tiña que volver a actuar alí. Xa o fixen en dúas ocasións en París, con Marful, e toquei boleros colaborando con David Murray en Niort. A miña familia e medio bretoña, e teño tocado na Bretaña... O que máis ilusión me fai é que vou estar soa no escenario. Tiña moitas ganas de seguir por ese camiño, facer sola composición e interpretación musical, porque é o meu espazo, onde me sinto máis cómoda e realizada. Será moi bonito, si», concluíu Ugia.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Ugia Pedreira dará un concerto no Instituto Cervantes de París