A Mancomunidade promocionará A Mariña en Fitur como destino turístico «slow»
A MARIÑA
A Mancomunidade de Concellos da Mariña Lucense promocionará a oferta do territorio coma destino turístico «slow» na próxima edición de Fitur, que se celebrará do 22 ao 26 de xaneiro en Madrid. Segundo explicou a axente de desenvolvemento turístico da Mancomunidade, Tania Ermida, a presentación terá lugar o xoves 23 no stand de Turismo de Galicia baixo o título A Mariña Lucense en 5 experiencias slow. Participarán o presidente da Mancomunidade, Alfredo Llano, e representantes do Concello de Ribadeo e do Concello de Viveiro. Llano dixo que se proporá tanto ao viaxeiro individual coma aos distintos operadores turísticos empaparse da calidade de vida da Mariña Lucense, do propio e auténtico do territorio, de forma tranquila, da man dos seus anfitrións, a xente local. Con isto o ente persigue dúas cousas: que se escolla A Mariña fronte ás présas, as aglomeracións, as colas, asfalto e ruídos doutros destinos e se viaxe ao xeodestino co propósito de acumular vivencias e non por intentar visitar o maior número de recursos no menor tempo posible. «A Mariña Lucense coma un destino de calidade, auténtico, multiexperiencial e por (re)descubrir», manifestou o rexedor burelense.