«Dá gusto traballar con xente que vén ilusionada buscar as súas vacacións»

Eroski Viaxes de Viveiro contratou nas súas primeiras semanas viaxes a Portugal, Mallorca ou Bali, como explica o seu responsable, Marco Uría


viveiro / la voz

Traballar nunha axencia de viaxes permite abrir a diario os ollos a outros lugares, a outras xentes, a outras realidades, a outras culturas... E desa experiencia están empezando a empaparse e a gozar Goretti Fernández Sánchez (Viveiro, 1977) e Marco Uría Sixto (Ferreira do Valadouro, 1977): xerente e responsable de oficina, respectivamente, da oficina que Eroski Viaxes acaba de abrir en Viveiro. O negocio comezou a funcionar o pasado 3 de decembro na avenida de Cervantes, e nestas dúas semanas xa contratou varias escapadas a Portugal, algunha viaxe a Mallorca e mesmo ten «mirada» unha viaxe á illa indonesia de Bali, como detalla Marco Uría.

-Como xurdiu a posibilidade de montar esta axencia en Viveiro?

-Ata que abrimos nós, as únicas oficinas de viaxes que tiña Eroski na provincia de Lugo eran as de Burela e Ribadeo. En toda Galicia hai unhas nove. Somos franquía, pero estamos apoiados moi intensamente pola marca, que sempre esta por detrás: supervisores e traballadores propios doutras oficinas, que sempre están formando parte do equipo e botando unha man.

-E por que se decantaron pola firma Eroski?

-Goretti ten relación empresarial con Eroski desde hai anos, porque ten dous supermercados da marca: o de Xove, que é unha sociedade, e o de Lourenzá, que é dela. Pareceulle interesante, porque coñeciamos as axencias de viaxes de Eroski como clientes e gustábanos como traballaban, a oferta que tiñan e que eran competitivas. Eliximos Viveiro para completar o servizo na zona, porque aquí hai algunha axencia menos que noutros sitios.

-Tiñan experiencia no sector turístico e das viaxes?

-En axencias de viaxes ningún dos dous, só como clientes. Eu traballei en turismo, pero nunha parte diferente, en información turística, que che permite coñecer á xente que viaxa. Pero collémolo con moita ilusión, porque é un traballo moi satisfactorio. Dá gusto traballar con xente que vén ilusionada buscar as súas vacacións, a súa viaxe ou coñecer un sitio novo. Poderlle axudar a alguén que vén contento a comprar as súas vacacións é moi gratificante.

-Empezar de cero sempre é complicado. Inician este proxecto con algunha oferta especial para captar a atención?

-Como axencia, Eroski ten en todas as súas delegacións e oficinas ofertas constantes, e na campaña de Nadal teñen vixente a oferta a determinados destinos. Tamén hai outra de cruceiros que leva desde outubro e aínda non rematou. Nós como oficina intentamos que todos os clientes que veñan novos teñan uns pequenos descontos para que o presuposto non sexa un problema, que polo menos é do cinco por cento. Ademais, os prezos de Eroski sempre son competitivos.

-Como valoran a acollida nestas primeiras semanas?

-Empezamos a ver interese por parte da xente, que vén preguntar bastante, e xa fan algunhas contratacións.

Perfil dos emprendedores. Marco Uría Sixto é natural de Ferreira do Valadouro, e Goretti Fernández Sánchez, nativa de Viveiro, é propietaria desde hai anos do supermercado Eroski de Xove, en sociedade, e do Eroski de Lourenzá.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«Dá gusto traballar con xente que vén ilusionada buscar as súas vacacións»