«O libro de Bolboretas no Bandullo ten o encanto que non hai nas redes»

Os blogueiros de orixe mariñá, Diana Fernández e David Díaz, fan hoxe a presentación en Viveiro


viveiro / la voz

Diana Fernández Gómez (Covas-Viveiro, 1989) e David Díaz Díaz (Xerdiz-Ourol, 1988) son blogueiros (Bolboretas no Bandullo, blogue en activo dende 2013) e os autores da que é a súa primeira publicación en papel: Cociñando con bolboretas no bandullo. A presentación do libro será hoxe en Viveiro (Libraría Porta da Vila, 19.00 horas). «Non é unha simple acumulación de receitas. É un proxecto dixital comprometido coa lingua e cultura galega que pretende facer unha achega importante á presenza do noso idioma na rede», sinalan os dous mariñáns.

-Como foi ese salto do mundo dixital ao mundo en papel?

-David: Era algo co que sempre soñabamos. Coincidiu que a Editorial Xerais púxose en contacto con nosoutros e aceptamos encantadísimos. Vimos a posibilidade dun proxecto ben fermoso. Sendo filólogos, o libro vai ter ese encanto que non hai nas redes.

-O malo é que un libro de cociña acaba ben manchado de graxa.

-David: Nós somos partidarios da biblioteca de cociña. De feito, unha nena veunos traer un libro para asinar e xa viña manchado.

-E iso que agora se cociña moito coa tablet á vista, non?

-David: Si, tamén é cómodo. Nós ofrecemos esa dobre opción e cada un coa súa vantaxe.

-Como son as receitas do libro?

-David: Son sinxelas para facer en familia. É importante que sexa cociña accesible e tamén para facer cos nenos. Comprobamos como na cociña se crea un vencello de éxito entre pais e fillos.

-Cantos seguidores teñen?

-Diana: En Instagram pasamos dos mil.

-David: En Facebook e Twitter temos sobre 2.500. O do blogue é un pouco diferente. As estatísticas dánnolas por lecturas, non por seguidores. Si que cando hai receitas, que publicamos martes e sábados, aumentan as visitas. Logo hai días que, polo que sexa, dan picos de lectura.

-Preocúpalles a audiencia?

-David: Para nada! Nós temos o noso traballo, que nos encanta. Os dous somos profes; eu no IES Monelos en A Coruña.

-Diana: Eu no IES Salvador de Madariaga, tamén en A Coruña. E penso o mesmo que pensa David, pois facemos isto porque nos gusta e nos aporta moita felicidade e alegría. Miramos si... de onde veñen as visitas.

-David: Principalmente son visitas galegas pero hai días ou semanas que proveñen de puntos concretos. A veces non temos explicación. O ano asado traballaron con blogue na Universidade de Vitoria e chamáronnos para dar unha conferencia alí.

-Tanto no blogue como no libro, o seu é a maridaxe da lingua galega e da cociña.

-David: Para nós non pode haber gastronomía sen lingua. É un sinal de identidade. É unha forma de cultura. Van man con man. Por iso este non é un simple libro de receitas; con iso queriamos mancar a diferenza.

-Diana: En cada receita hai un microrrelato, microconto e as receitas teñen un código QR que levan ao lector á canle de YouTube.

-Serán fans totais de Cunqueiro.

-David: Somos fans de Cunqueiro, aínda que el levou a fama pero quen cociñaba non era tanto el. Os seus libros de gastronomía están na casa e dannos moitísimos xogo. Represéntannos un pouco pola combinación literario-gastronómica.

-Quen apadriñou o libro?

-Diana: Temos de madriña a Ledicia Costas.

-David: Pero tamén hai un caso especial. Quen deu a coñecer o noso blogue foi Agustín Fernández Paz. Cando nolo dixo a editora Celia Torres, caéronnos as bágoas. É emotivo porque hai case dous anos que non está con nos pero é o autor co que comezamos as nosas lecturas adolescentes e andabamos namorando e foi a primeira persoa en rechouchiar en Twitter na nosa conta. A dedicatoria foi para el.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«O libro de Bolboretas no Bandullo ten o encanto que non hai nas redes»