O futbolista de Ourol ten varias propostas enriba da mesa tras rematar antes do previsto a súa segunda etapa no Anxo Carro
17 nov 2018 . Actualizado a las 20:48 h.Punto e final á segunda etapa de Óscar Rivas (Ourol, 1992) no Club Deportivo Lugo. «Foron anos moi intensos que levaron consigo moito esforzo e dedicación. Voume contento e satisfeito por ter dado todo por estas cores e só pido que os que se enfunden esta camiseta o fagan coa mesma ilusión e respecto que o fixen eu (...). O meu agradecemento a compañeiros, técnicos e a todos os estamentos do club, en especial ao seu presidente, Tino Saqués, pola súa cercanía e sinceridade (...) Mágoa que algunhas persoas non estean á altura deste gran club». Estes son algúns dos fragmentos da súa mensaxe de despedida nas redes sociais.
-¿Quen son esas persoas que di que non están á altura?
-Prefiro non dicir nada máis.
-¿Foi unha saída pactada?
-Máis ou menos. As dúas partes queriamos romper o compromiso.
-¿Vaise con rencor cara a alguén?
-En absoluto. Voume totalmente a gusto e coa cabeza ben alta porque durante estes tres anos e tamén na primeira etapa tratei de dar o mellor de min para defender ao CD Lugo. Non creo que ninguén me poida reprochar nada. Se o ano pasado non ascendéramos co Polvorín entón si que me que iría a desgusto.
-¿Ese salto a Terceira co Polvorín foi o mellor da súa segunda etapa no Anxo Carro?
-Desde logo que si. Tiven a sorte de xogar varios partidos oficiais co primeiro equipo e compartir vestiario con xogadores profesionais que sempre me trataron como un compañeiro máis. Esas vivencias non as esquecerei xamais, pero a experiencia do ascenso foi aínda mellor.
-¿Como era a súa relación con José Durán, o adestrador do filial?
-Boa, sempre boa.
-Na presente tempada foi titular no primeiro partido ante o Compostela e lesionouse...
-Así é, aos 20 ou 25 minutos de partido. Sufrín un esguice forte con rotura de ligamento e xa non volvín a xogar desde aquela.
-¿Xa está recuperado?
-Si, ao 100 %.
-¿E ten pensado volver a xogar nesta campaña?
-Vou tomar un período de reflexión de dúas ou tres semanas, que o necesito sobre todo para dixerir certas cousas, e despois tomarei unha decisión. Ata me plantexei deixar o fútbol...
-Seguro que non lle faltan ofertas para volver a xogar xa.
-Algunha hai, si.
-¿Podería acabar a tempada nalgún dos equipos mariñáns?
-Só volvería agora ao fútbol mariñán para xogar no Viveiro. Teño claro que antes ou despois volverei a Cantarrana.