Adrián González-Seco Fernández abre novo bufete en Burela
14 sep 2018 . Actualizado a las 05:00 h.Despois de atender a un cliente, o primeiro sempre, dedica uns minutos a esta entrevista. Faltan unhas horas para a inauguración do seu novo bufete de avogados, en Burela. E aínda que é fillo dun veterano profesional mindoniense do ámbito xudicial, como é José Eduardo González-Seco, a relación paterno-filial non lle supón presión ningunha á hora de abrir o despacho: «Todo o contrario que presión. É unha sorte porque el, queiras que non, leva 40 anos na profesión. Abriu o despacho de Mondoñedo e é de gran axuda, porque todo o que poda aprender del é moito. Máis ca presión, é axuda e sorte».
-Foi o lazo familiar o que o levou a escoller este oficio?
-Dende sempre, dende pequeno, vin a meu pai no seu despacho e sempre me chamou a atención o oficio. De feito, cando acabei no instituto non tiven dúbida do que quería estudar.
-O máis habitual é rematar o instituto e ter moitas dúbidas...
-No meu caso, non. Tíñao clarísimo. Así foi que empecei. Sempre me gustou moito a profesión.
-Onde e como se formou?
-Acabei hai cinco anos a carreira. Estudei en Santiago e A Coruña. Fixen un máster de avogacía no Colexio de Avogados de Lugo. Ademais, teño cursos de especialización feitos na USC e tamén vía Internet.
-Agora dá un paso de xigante abrindo o seu propio bufete.
-Ábroo eu, pero teño colaboracións con máis profesionais. Levamos civil, penal, laboral, seguridade social, urbanismo e administración de terreos. Tamén ofrecemos servizos de asesoría, nese caso en colaboración con Asesoría Montero.
-Por que elixiu Burela?
-É un proxecto no que levaba pensando dende hai tempo. É unha aposta persoal. A miña idea é expandir o despacho. Meu pai leva 40 anos en Mondoñedo, pero apetecíame saír e probar novas metas. De todas maneiras, sigo indo alí porque teño que ir moito a Mondoñedo. De feito, ando a cabalo entre Mondoñedo e Burela.
-Lembra cal foi o seu primeiro caso, cando comezou a exercer?
-O meu primeiro caso foi unha división de herdanza.
-Herdanzas... empezou forte.
-Si, empecei forte. Pero moi ben. Evidentemente, as primeiras veces que me subía ao estrado ía un pouco nervioso, pero coa práctica iso vaise normalizando.
-Cales son os asuntos que máis defensa xurídica requiren?
-Creo que sobre todo civil, laboral e penal están nos primeiros postos da clasificación.